‘गोमांस खाणाऱ्यांना फासावर लटकवा’

पणजी : ‘गोमांस खाणे हे उच्चभ्रू असल्याचे लक्षण आहे, असे समजणाऱ्यांना फासावर लटकवावे,’ अशी मुक्ताफळे साध्वी सरस्वती यांनी गोव्यामध्ये उधळली आहेत.

साध्वी सरस्वती या सनातन धर्म प्रचार सेवा समितीच्या अध्यक्ष आहेत. गोव्यामधील रामनाथी गावात विविध हिंदू संघटनांतर्फे आयोजित संमेलनात त्यांनी हे मत व्यक्त केले. गाय ही आपली माता आहे आणि मातेचे मांस खाणे ज्यांना प्रतिष्ठेचे वाटते त्यांना फासावर लटकवावे, अशी माझी सरकारला विनंती आहे, असे सरस्वती म्हणाल्या.

त्याचप्रमाणे, हिंदूंनी घरात शस्त्रे बाळगली पाहिजेत, असे वक्तव्यही त्यांनी या वेळी केले. आपण घरी शस्त्र बाळगली नाहीत, तर भविष्यात आपण नष्ट होऊ, असे त्या म्हणाल्या. चार दिवसांच्या या संमेलनामध्ये भारताच्या २१ राज्यांसह बांगलादेश, श्रीलंका आणि नेपाळमधून सुमारे १३० हिंदू संघटना सहभागी झाल्या होत्या.