'ते' १४ हजार कोटी अमित शहांचे

मटा ऑनलाइन वृत्त । अहमदाबाद

महेश शहा या व्यापाऱ्याकडे आढळून आलेले १४ हजार कोटी रुपये दुसरे तिसरे कोणाचेच नसून भारतीय जनता पक्षाचे राष्ट्रीय अध्यक्ष अमित शहा यांचे आहेत, असा खळबळजनक दावा पाटीदार आंदोलन समितीचा नेता हार्दीक पटेल यांनी केला आहे. पटेल यांनी टि्वट करुन हा दावा केला आहे.

हार्दीक पटेल यांनी शनिवारी रात्री ८ वाजता हे टि्वट केले. 'ही सर्व संपत्ती अमित शहा यांचीच आहे,' असे टि्वट पटेल यांनी करताच आम आदमी पक्षाचे नेते आणि दिल्लीचे मुख्यमंत्री अरविंद केजरीवाल यांनी त्याला रिटि्वट केले. ' हे सत्य आहे काय?' असा सवाल केजरीवाल यांनी रिटि्वीट करुन केला आहे.

सीसीटीव्ही फुटेज तपासा

भाजपा कार्यालय कमलममधील सीसीटीव्ही फुटेज तपासण्यात यावेत. त्यात महेश शहा भाजपाच्या कोणत्या नेत्याशी संबंधित आहे, हे दिसून येईल. तसेच फोन रेकॉर्डींगची डिटेल्स घेतल्यावरही संपूर्ण सत्यबाहेर येईल, असा दावा पटेल यांनी त्यांच्या पुढच्या टि्वटमध्ये केला आहे.

महेश शहा याच्या मागील तीन महिन्याच्या हालचाली आणि त्याच्या व्यवहाराची आयकर विभागाने चौकशी करायला हवी. महेश शहा नेहमी गांधी नगरच्या भाजपा कार्यालयात जायचा. अमित शहा यांच्या सांगण्यावरुन हा व्यापारी भाजपाचे नेते आणि कार्यकर्त्यांना भेटायचा, असे सांगतानाच काळा पैसा लपविण्यासाठी महेश शहाला प्यादा करण्यात आले आहे. या व्यापाऱ्याच्या जीवाला धोका निर्माण झाल्याने त्याला संरक्षण द्यायला हवे, अशी मागणी पटेल यांनी केली आहे.