पुरुषांना पाहिलं तरी 'ती' बेशुद्ध पडते!

मटा ऑनलाइन वृत्त | हरयाणा

हरयाणातील हथीनजवळील एका गावात ६ वर्षांच्या मुलीचे अपहरण करून तिच्यावर बलात्कार केल्याची खळबळजनक घटना घडली आहे. घटनेला ३० तास उलटून गेले तरी बलात्कारपीडित मुलगी शुद्धीवर आली नाही. त्यामुळे पोलिसांना तिचा जबाब नोंदवून घेता आला नाही. सध्या तिची प्रकृती स्थिर आहे. पण पुरुषांना पाहिले तरी ती बेशुद्ध पडते, असे पोलीस सूत्रांनी सांगितले.

हथीन पोलीस ठाण्याच्या निरीक्षक कमला देवी आणि ए.एस.आय. अनिता यांनी साध्या वेशात मुलीशी बोलण्याचा प्रयत्न केला. मात्र, मानसिक धक्क्यातून ती अद्याप सावरली नाही. त्यामुळे तिचा जबाब नोंदवून घेता आला नाही, असेही पोलीस सूत्रांनी सांगितले. हथीन पोलीस ठाण्याच्या हद्दीतील एका गावात सोमवारी रात्रीच्या सुमारास ६ वर्षांच्या मुलीचे अपहरण करण्यात आले. मुलीचे वडील झोपेतून जागे झाल्यानंतर घरात मुलगी नसल्याचे त्यांच्या लक्षात आले. त्यांनी आजूबाजूला शोधाशोध केली. घराजवळील एका रिकाम्या फ्लॅटमध्ये ती बेशुद्ध अवस्थेत सापडली. तिला मंगळवारी सकाळी रुग्णालयात दाखल करण्यात आले. संपूर्ण दिवस ती बेशुद्धावस्थेत होती. रात्री ती शुद्धीवर आली. पण काही वेळाने पुन्हा बेशुद्ध पडली. तिची प्रकृती स्थिर असली तरी तिला जबरदस्त मानसिक धक्का बसला आहे, असे डॉक्टरांनी सांगितले. वारंवार बेशुद्ध पडत असल्याने तिचा जबाब नोंदवून घेण्यात पोलिसांना अडचणी येत आहेत.

दरम्यान, या प्रकरणी पोलिसांनी संशयावरून तीन ते चार तरुणांना ताब्यात घेतले आहे. त्यांची चौकशी करण्यात येत आहे. मुलगी पूर्ण शुद्धीवर येत नाही, तोपर्यंत तिचा जबाब नोंदवून घेतला जाणार नाही, असे पोलिसांनी सांगितले.