राजीनामा मागायचा त्यांना मागू देत : खट्टर

मटा ऑनलाइन वृत्त । दिल्ली

डेरा सच्चा सौदाचा प्रमुख गुरमीत रामरहीमला झालेल्या शिक्षेनंतर उसळलेला हिंसाचार रोखण्यात असफल झाल्याची टीका हरयाणाचे मुख्यमंत्री मनोहरलाल खट्टर यांच्यावर झाली. त्यानंतर आज त्यांनी भाजप अध्यक्ष अमित शाह यांची भेट घेतली आणि त्यांना हरयाणातल्या ताज्या परिस्थितीची माहिती दिली. त्यांच्या राजीनामाची मागणी विरोधी पक्ष करत आहे. त्यावर भाष्य करताना ते म्हणाले, 'जे राजीनामा मागत आहे, ते मागत राहू देत. मी माझे काम योग्य प्रकारे केलं आहे.'

न्यायालयाच्या निर्देशांनुसार आपण पावले उचलल्याची माहिती त्यांनी शाह यांना दिली. परिस्थितीनुसार आपण निर्णय घेतले आणि त्यावर पूर्ण समाधानी असल्याचे खट्टर यांचे म्हणणे आहे.
रामरहीम दोषी ठरल्यानंतर एक आठवड्यापर्यंत न्यायालयाने आपला निर्णय राखून ठेवला होता. इतका अवधी मिळूनही डेराच्या लाखो अनुयायांना पंचकुला आणि सिरसा येथे पोहोचण्यापासून आणि नंतरच्या हिंसेपासून रोखण्याच खट्टर सरकार अपयशी ठरले होते. यापूर्वीदेखील जाट आंदोलन आणि बाबा रामपाल यांच्या अटकेनंतर उसळलेल्या हिंसाचारावरून खट्टर प्रशासनावर टीका झाली होती.

खट्टर यांना केंद्र सरकारने अभय दिले. पण त्यांच्या कामकाजावर आता प्रत्यक्ष पंतप्रधान कार्यालयाची बारिक नजर असणार आहे, असे वृत्त आहे. हरयाणात उसळलेल्या हिंसाचारात ३० हून अधिक जण मृत्युमुखी पडले तसंच सरकारी मालमत्तेचंही नुकसान झालं आहे.