जुनैद हत्याकांडप्रकरणी आणखी ४ जणांना अटक

मटा ऑनलाइन वृत्त । बल्लभगड (हरयाणा)

ट्रेनमधील सीटच्या जागेच्या वादावरुन जुनैद या तरुणाची हत्या केल्याप्रकरणी बल्लभगड पोलिसांनी आणखी चार आरोपींना आज अटक केली आहे. या हत्याकांडात आतापर्यंत एकूण ५ आरोपींना अटक करण्यात पोलिसांना यश आले आहे.

बल्लभगडमधील हथीन या ठिकाणाहून चार आरोपींना पोलिसांनी आज अटक केली आहे. पोलिसांनी याप्रकरणी आधी ७ जणांना चौकशीसाठी ताब्यात घेतले होते, या ७ जणांची चौकशी झाल्यांनंतर त्यातील ४ जणांना पोलिसांनी अटक केली. जुनैदच्या हत्येनंतर सरकारवर चौफेर टीका होत असून या हत्येचा निषेध केला जात आहे. विरोधकांनी हरयाणा सरकारविरोधात जोरदार आंदोलन सुरू केले आहे. दरम्यान, हरयाणाचे मुख्यमंत्री मनोहर लाल खट्टर यांनी जुनैदच्या परिवाराला १० लाख रुपये देण्याची घोषणा केली आहे.

Haryana: Four accused arrested in Palwal lynching incident — ANI (@ANI_news) June 28, 2017
जुनैदच्या हत्येनंतर मेवातमध्ये मुस्लिम समाजाची महापंचायत झाली असून या महापंचायतीने दिल्लीत २ ते ४ जुलै रोजी तीन दिवसीय आंदोलन करण्याचा इशारा दिला आहे. मेवात, पलवल, फरीदाबाद, गुडगाव, भरतपूर आणि अलवर येथील मुस्लिमांनी या महापंचायतीत सहभाग घेतला होता. या पंचायतीत अनेक नेते, वकील तसेच ८० गावामधील सरपंच सहभागी झाले होते. दिल्लीतील जंतर-मंतरवर २०० लोक आळीपाळीने आंदोलनात सहभाग घेतील, असेही महापंचायतीकडून सांगण्यात आले. आंदोलन यशस्वी करण्यासाठी ३१ सदस्यांची एक समिती बनवण्यात आल्याची माहितीही या महापंचायतीनं दिली आहे.