Mohammed shami शमीसोबत नातं तोडू देणार नाही: हसीन जहाँ

अमरोहा : क्रिकेटपटू मोहम्मद शमी आणि त्याची पत्नी हसीन जहाँ यांच्यात सुरू असलेल्या वादाला आता नवीन वळण लाभलं आहे. रविवारी शमीच्या घरी पोहोचलेल्या हसीनने शमीशी नातं न तोडण्याचे संकेत दिले आहेत. अर्थात तिच्या काही अटी शमीला मानाव्या लागणार आहेत.

उत्तर प्रदेशच्या अमरोहा जिल्ह्यातील डिडोली येथील सहजपूर अलीनगर गावात शमीचं वडिलोपार्जित घर आहे. हसीन तिथे पोहोचली तेव्हा घराला कुलुप होतं. तिने शमीच्या काकांजवळ आपलं सामान ठेवलं. हसीनसोबत तिची मुलगी आणि वकीलही होते.

प्रसारमाध्यमांशी बोलताना ती म्हणाली, 'मी आधीही म्हटलंय की काहीही झालं तरी हे नातं मी तुटू देणार नाही. पण शमीची चूक झाली आहे, त्यासाठी त्यांनी माफी मागायलाच हवी. ज्या दिवशी ते माफी मागतील त्या दिवशी माझं घर वाचेल. मी घर तोडू देणार नाही आणि माझा अधिकारही सोडणार नाही.'

शमीवर लावलेल्या आरोपांवर मात्र हसीन अजूनही ठाम आहे. आपण पुराव्यानिशी शमीवर आरोप केल्याचं तिचं म्हणणं आहे. मात्र प्रसारमाध्यमांनी ते झाकून आपल्यालाच व्हिलन केल्याचं ती म्हणाली.

'डिडोली पोलीस ठाण्याच्या निरीक्षकांशी आपण बोललो आहोत. ते त्यांच्या पूर्ण टीमसोबत आले होते. कुलूप तोडून मला घरात प्रवेश देण्याचा त्यांनी शब्द दिला आहे,' अशी माहिती हसीनने दिली.