'मी कुणाचा नाही, भ्रष्टाचार खपवून घेणार नाही'

मटा ऑनलाइन वृत्त । नवी दिल्ली

पंतप्रधान नरेंद्र मोदी यांनी भाजप कार्यकारिणीच्या बैठकीत भ्रष्टाचार आणि विरोधी पक्षांवर हल्लाबोल केला. 'सत्तेत असताना विरोधी पक्षांना सत्ता उपभोगाची वस्तू वाटत होती. आता नेमकी काय भूमिका घ्यायची हेच विरोधकांना उमजत नाहीए. तसंच भ्रष्टाचार अजिबात खपवून घेणार नाही', असं मोदी म्हणाले.

'आरोपांसाठी कुठलेही मुद्दे नसले की विरोधक जहरी शब्दात टीका करतात. पण अशी भाषा पर्याय ठरू शकत नाही', असं सडेतोड प्रत्युत्तर मोदींनी दिलं. 'भ्रष्टाचारावर कुठलीही तडजोड करणार नाही. भ्रष्टाचारात जो कोणी सापडेल तो सुटणार नाही. माझा कुणाशीही संबंध नाही आणि माझं कोणीही नाही', असं मोदींनी स्पष्ट केलं. भाजप कार्यकारिणीच्या बैठकीनंतर अर्थमंत्री अरुण जेटली यांनी मोदींनी केलेल्या भाषणाची माहिती दिली.

पंतप्रधान मोदींनी कार्यकर्त्यांना सरकारच्या योजना जनतेपर्यंत नेण्याचं आवाहन केलं. 'राजकीय पक्ष म्हणून निवडणूक लढणं हा एक भाग आहे. पण कार्यकर्त्यांनी आणि नेत्यांनी भाजपला या पलिकडे नेलं पाहिजे. लोकांचा सहभाग वाढवला पाहिजे. राजकीय कार्यकर्ता लोकांमध्ये मिसळत नाही तोपर्यंत सरकारची कुठलीही योजना पुढे जाऊ शकत नाही', असं पंतप्रधान नरेंद्र मोदी म्हणाले.