....आणि 'त्यांनी' बनवलं सापाचं ओपीडी कार्ड

बालासोर: दवाखान्यात गेल्यावर सामान्य लोकं चेकअप करण्याआधी अनेकदा ओपीडी कार्ड बनवतात पण ओडिशामध्ये मात्र चक्क एका सापाचे ओपीडी कार्ड बनवल्याची घटना घडली आहे. संबंधित डॉक्टरांनीही सापाला प्राथमिक औषधं देऊन त्याला पशुचिकित्सालयात जाण्याचा सल्ला दिला.

स्थानिक वर्तमानपत्रांनी दिलेल्या माहितीनुसार मनोज दास (५९) यांना या जखमी सापाची माहिती मिळाली होती. झाडींमध्ये घायाळ अवस्थेतील या सापाला पाहून त्याची प्रकृती चिंताजनक आहे हे लगेच लष्करातून निवृत्त झालेल्या दास यांच्या लक्षात आलं. त्यांनी लगेच सापाला जवळच्या पशू चिकित्सालयात नेले. पण ते रुग्णालय बंद असल्यामुळे शहरातील फकीर मोहन मेडिकल कॉलेज आणि रुग्णालयात ते त्याला घेऊन गेले. या रुग्णालयात रुग्णाचे ओपीडी कार्ड बनवणं गरजेचं असतं. त्यानुसार त्यांनी रुग्णाचं नाव 'सापा' सांगितलं, तो पुरुष असून सात वर्षाचा असल्याची माहिती दिली. कार्ड बनवणाऱ्या कर्मचाऱ्यानेही तो माणूस आहे की साप हे विचारण्याची तसदी घेतली नाही. कार्ड घेऊन दास जेव्हा डॉक्टरांकडे गेले तेव्हा रुग्णाला पाहून त्यांना धक्काच बसला. सापावर उपचार करण्यास त्यांनी नकार दिला. अखेर अनेकदा विनंती केल्यानंतर त्यांनी सापला अॅण्टीसेप्टीक गोळी दिली आणि दुसऱ्या पशुचिकित्सालयात पाठवलं.

नंतर या सापावर पशूचिकित्सालयात उपचार झाल्यानंतर दास यांनी त्याला जंगलात सोडलं. माणसाप्रमाणेच प्राण्यांनाही उपचाराची गरज भासू शकते. तेव्हा त्यांच्या तब्येतीकडेही लक्ष द्यायला हवं अशा भावना दास यांनी व्यक्त केल्या आहेत.