'जीवन सुंदर करण्यासाठी झाडे लावा': तालिबान

मटा ऑनलाइन वृत्त । मुंबई

स्टेनगन, बंदूका, बॉम्ब आणि जिहादची भाषा बोलणाऱ्या आणि जागोजागी सुरूंग पेरणाऱ्या तालिबानने जर 'जीवन सुंदर करण्यासाठी झाडे लावा, भरपूर झाडे लावा,' असा नारा दिला तर...काय? आश्चर्य वाटले ना? पण ते खरं आहे. सदैव बॉम्बची भाषा बोलणाऱ्या तालिबानने सध्या आफगानिस्तानच्या 'अवाम'ला झाडे लावण्याचे आवाहन केले असून त्यासाठी पवित्र कुराणाचा संदर्भ दिला आहे.

तालिबानचा मोहरक्या हबीतुल्लाह अखुंदजादा याने हे आवाहन केल्याने आश्चर्य व्यक्त केले जात आहे. 'वर्तमान जगात आणि मृत्यूनंतरच्या जगात चांगलं जीवन जगायचं असेल तर आताच जास्तीत जास्त झाडे लावा,' असे आवाहन तालिबानने केले आहे. अखुंदजादाने पाकिस्तानच्या एका मदरशात १५ वर्षाहून अधिक काळ विद्यार्थ्यांना शिक्षणाचे धडे दिले आहेत. तो मौलवी सुद्धा होता. त्यामुळेच तो झाडे लावणे हे कुराणात सांगितलेले एक कर्तव्यच असल्याचं अफगानी नागरिकांना पटवून देतोय.

तालिबानकडून 'विशेष संदेश' नावाचे वर्तमानपत्र प्रकाशित केले जाते. त्यातून त्यांनी झाडे लावण्याची मोहिम छेडली आहे. तरुणांनी आणि अफगान नागरिकांनी एक किंवा त्यापेक्षा अधिक फळ देणारे अथवा फळे न देणारी झाडे लावावीत. त्यामुळे पृथ्वीचे सौंदर्य वाढते आणि अल्लाहने निर्माण केलेल्या जीवांचे संरक्षण होते, असे अखुंदजादाने म्हटले आहे. इंग्रजीसहित चार भाषांमध्ये अखुंदाजादाचा हा संदेश छापण्यात आलाय. विशेष म्हणजे अफगानिस्तानात मोठ्या प्रमाणावर वायू आणि ध्वनी प्रदूषण आहे. या प्रदूषणामुळे काबूलमध्ये दरवर्षी ४ हजार लोक मरत असल्याचा अफगाण सरकारचा आकडा आहे, अशावेळी तालिबानने बॉम्ब ऐवजी झाडे लावण्याची भाषा करणे अत्यंत महत्त्वाचे मानले जाते.