लवकरच आंतरराष्ट्रीय उड्डाणांनाही परवानगी मिळण्याची शक्यता

नवी दिल्ली : देशांतर्गत उड्डाण सुरू झाल्यानंतर आता आंतरराष्ट्रीय उड्डाणंही लवकरच सुरू होण्याची चिन्हं आहेत. नागरी उड्डाण मंत्री हरदीप सिंग पुरी यांनी आंतरराष्ट्रीय उड्डाणांसाठी रणनीती बनवण्याची तयारी सुरू केलीय. त्यामुळे, ऑगस्ट महिन्यापूर्वीच आंतरराष्ट्रीय उड्डाणं सुरू होण्याची शक्यता वर्तवण्यात येतेय. आरोग्य मंत्रालयानं आंतरराष्ट्रीय आगमनासाठी टेस्टिंग आणि क्वारंटाईनसाठी कडक गाईडलाईन्स जारी केल्या आहेत.

या गाईडलाईन्सनुसार, हवाई प्रवाशांमध्ये सर्दी, ताप, खोकला अशी लक्षणं दिसली तर त्यांना कोविड टेस्ट (RT-PCR टेस्ट) अनिवार्य असेल. विमान प्रवासापूर्वी प्रत्येक प्रवाशाला १४ दिवसांच्या क्वारंटाईनमध्ये जाण्याचं अंडरटेकिंग द्यावं लागणार आहे. परदेशातून येणाऱ्या प्रवाशांची टेस्टिंग ICMR च्या प्रोटोकॉलनुसार होईल. ज्या प्रवाशांमध्ये करोनाची लक्षणं आढळतील त्यांना पुढचे ७ दिवस आपल्या खर्चावर इन्स्टिट्युशनल क्वारंटाईनमध्ये राहावं लागेल. ७ दिवस इन्स्टिट्युशनल क्वारंटाईनमध्ये राहिल्यानंतर त्यांना त्यापुढचे सात दिवस होम क्वारंटाईनमध्ये राहावं लागेल.

आंतरराष्ट्रीय उड्डाणांबद्दल सतर्कता वाढवण्याची गरज जेडीयूनं व्यक्त केलीय. गृह मंत्रालयाकडून आणि आरोग्य मंत्रालयाकडून बनवण्यात आलेल्या कायद्यांचं उल्लंघन करणाऱ्यांविरोधात सक्त कारवाईचंही प्रावधान असायला हवं, अशी मागणीही जेडीयूचे मुख्य महासचिव के सी त्यागी यांनी एका वाहिनीशी बोलताना केलीय.