जम्मू सीमेवर पाकचा गोळीबार, BSF चा जवान शहीद

मटा ऑनलाइन वृत्त । नवी दिल्ली

जम्मूलगत आंतरराष्ट्रीय सीमेवर पाकिस्तानने काल रात्री केलेल्या गोळीबारात सीमा सुरक्षा दलाचा एक जवान शहीद झाला तर एक जवान जखमी आहे. सुशील कुमार असे शहीद जवानाचे नाव आहे. भारतीय सैन्याने या गोळीबाराला चोख प्रत्युत्तर दिले. आंतरराष्ट्रीय सीमेवरील शस्त्रसंधीचे उल्लंघन करत पाकिस्तानने हा गोळीबार केला आहे.

सीमेलगत आरएस पुरा, पर्गवाल, कानाचक भागातल्या सुमारे १३ सीमा चौकींवर आणि नागरी भागात रात्रभर गोळीबार सुरू होता. एएनआयच्या वृत्तानुसार, पाकिस्तानकडून झालेल्या या गोळीबारात दोन स्थानिक नागरिकही जखमी झाले आहेत.

या अंदाधुंद गोळीबारापासून बचाव करण्यासाठी गावकरी रात्रीपासून इतरत्र आसरा घेत आहेत. काहींनी गाव सोडून जायच्याही हालचाली केल्या आहेत. पर्गवालच्या अखनूर भागात, आरएस पुरा क्षेत्रात रात्रभर हा गोळीबार सुरू होता.