दिल्ली दाट धुक्याखाली!

मटा ऑनलाइन वृत्त। नवी दिल्ली

नोव्हेंबर महिन्याच्या सुरूवातीपासूनच दिल्लीत थंडीने आपले साम्राज्य पसरायला सुरूवात केली असली तरी आजची सकाळ मात्र थंड-गार वाऱ्यासोबतच धुक्याची चादर पांघरून आलेली दिसली.


दाट धुक्यामुळे रस्त्यावर समोर २००-३०० मीटर अंतरावरील चित्रही नीट दिसत नसल्याने वाहनांचा वेग मंदावलेला दिसला. धुक्यामुळे सकाळी शाळकरी मुलांना नेणाऱ्या स्कूल बसेसही काहीशा उशिरानेच पोहोचल्याने आज शाळाही उशिरा भरल्याचे चित्र काही ठिकाणी दिसले.

तसे नोव्हेंबर, डिसेंबर, जानेवारी या अतिथंडीच्या मोसमात दिल्लीत धुके पसरलेले पाहायला मिळणे, हे चित्र दिल्ली वासियांसाठी काही नवीन नाही. परंतु अलिकडच्या काळात दिल्लीत वाढलेले प्रदूषण पाहता या नैसर्गिक धुक्यात प्रदुषणाचाच अंश अधिक असल्याचे म्हटले जात आहे. त्याचाच परिणाम म्हणून या महिन्याच्या सुरूवातीला दिल्लीवासियांना श्वसनाच्या आजारांचा सामना करावा लागला होता.

वातावरणात पसरलेला धूर, धुलीकण, विषारी वायूंचे कण आणि निसर्गात असलेले दव व पाण्याच्या कणातून तयार झालेल्या प्रदूषित धुक्यामुळे अनेकांना श्वसन विकार, डोळे चुरचुरणे, घसा खराब होणे तसेच इतर संसर्ग झाले होते. यावर उपाय म्हणून घराबाहेर न पडण्याचा सल्ला दिल्ली सरकारने दिला होता. दिल्लीतील शाळाही दरम्यान बंद ठेवण्यात आल्या होत्या. सुरक्षिततेचे उपाय म्हणून दिल्लीतील बांधकामे थांबविण्यात आली होती. डिझेल यंत्रे वापरण्यावर बंदी आणली होती. झाडपाला, कचरा जाळण्यासही मनाई करण्यात आली होती.