भारत 'अशी' घेतोय पाकिस्तानी हेराची काळजी!

मटा ऑनलाइन वृत्त। भोपाळ

पाकिस्तानच्या लष्करी न्यायालयाने भलेही भारतीय नागरिक कुलभूषण जाधव यांना हेरगिरीच्या आरोपावरून फाशीची शिक्षा सुनावली असेल, पण देशातील भोपाळ पोलिस मागील जवळपास वर्षभरापासून पाकिस्तानी गुप्तहेर साजिद मुनीर याची काळजी घेत आहेत.

पाकिस्तानी गुप्तहेर साजिद मुनीरवर आयएसआयसाठी भोपाळच्या सैन्यतळाची हेरगिरी करत असल्याचा आरोप होता. आरोप सिद्ध झाल्यानंतर त्याला १२ वर्षांच्या तुरुंगवासाची शिक्षा सुनावली गेली होती. गेल्या वर्षी जूनमध्ये त्याने शिक्षेचा कालावधी पूर्ण केला. शिक्षा पूर्ण झाल्यानंतर भारत सरकारने मुनीरच्या प्रत्यार्पणासाठी पाकिस्तानला अपीलपत्र पाठविले. मात्र पाकिस्तानने मुनीरच्या प्रत्यार्पणासंबंधी भारत सरकारच्या अपीलपत्राला कोणतेही उत्तर न दिल्याने मुनीरला भोपाळ पोलिसांच्या ताब्यात देण्यात आले. तेव्हापासून साधारण १० महिने जिल्हा विशेष शाखा (डिस्ट्रिक्ट स्पेशल ब्रांच) पोलिस मुनीरची काळजी घेत आहेत.

भोपाळ पोलिसांनी कित्येक वेळा मुनीरला पाकिस्तानने परत घेऊन जाण्याविषयी पत्र लिहिले, मात्र तिकडून कोणतीही प्रतिक्रिया न मिळाल्याने मुनीर भोपाळ पोलिसांची जबाबदारी बनला. मागच्याच आठवड्यात पुन्हा भोपाळच्या डिएसबी पोलिसांनी परराष्ट्र मंत्रालयाला पत्र लिहून कळविले. मात्र त्यावरही अद्याप उत्तर आलेले नाही. पाकिस्तान असे का करत आहे, याविषयी माहिती घेतल्यानंतर पोलिसांना कळाले की, मुनीरने कराचीमध्ये एका व्यक्तीची हत्या केली होती. पोलिसांपासून वाचण्यासाठी तो आयएसआयच्या संपर्कात आला. त्यानंतर आयएसआयने मुनीरला कराची पोलिसांच्या ताब्यात न देण्याच्या बदल्यात भारतात हेरगिरी करण्यासाठी पाठविले.