'त्यांचं' प्रेम म्हणजे लव जिहाद: हिंदू महासभा

मटा ऑनलाइन वृत्त । नवी दिल्ली

संपूर्ण सोशल मिडिया 'त्या' युपीएससी टॉपर्सच्या प्रेमाचे गोडवे गात असताना हिंदू महासभेने मात्र त्यांच्या प्रेमाला 'लव जिहाद'चं लेबल लावून टाकलंय. आयएएस टॉपर्स टीना डाबी आणि अतहर आमिल-उल शफी खान यांच्या लग्नाला आक्षेप घेत हे लग्न म्हणजे लव जिहाद असल्याचे पत्र हिंदू महासभेने टीनाच्या पालकांना पाठवले आहे. काही दिवसांपूर्वीच टीना डाबीने अतहर याच्याशी लवकरच साखरपुडा होणार असल्याचे जाहीर केले होते. टीना ही २०१५ च्या युपीएससी परीक्षेत पहिली तर अतहर दुसरा आला होता.

हिंदू महासभेचे राष्ट्रीय सचिव मुन्ना कुमार शर्मा यांनी हे पत्र पाठवले आहे. टीनाच्या युपीएससी परीक्षेतल्या यशाबद्दल शर्मा यांनी आनंद व्यक्त केला आहे, पण तिच्या वडिलांना तिच्या अतहरशी होणाऱ्या लग्नाबद्दल पुनर्विचार करण्याचा सल्ला त्यांनी दिला आहे. ते शक्य नसेल तर अतहरला आधी 'घर वापसी' करायला लावण्याची मागणीही केली आहे. टीना ही दलित समाजाची आहे तर अतहर काश्मीरी मुस्लीम आहे.

यापूर्वी टीना डाबी टाइम्स ऑफ इंडियाशी बोलताना म्हणाली होती, 'आम्ही दोघं नॉर्थ ब्लॉकमध्ये पर्सनल अॅंड ट्रेनिंग डिपार्टमेंटमध्ये भेटलो. पहिल्या नजरेतच आम्ही एकमेकांच्या प्रेमात पडलो. मी एक स्वतंत्र, स्वावलंबी स्त्री आहे. मला माझी निवड करण्याचा पूर्ण अधिकार आहे. आमच्या पालकांनीही आमचं नातं स्वीकारलं आहे.'

हिंदू महासभेने यापूर्वी बॉलिवूड अभिनेते सैफ अली खान आणि करिना कपूर यांच्या लग्नालाही लव जिहाद म्हटले होते.