priyanka: रोड शोपूर्वी प्रियांकांची 'ट्विटर एंट्री'

नवी दिल्ली

काँग्रेच्या महासचिवपदी नियुक्तीनंतर यूपीतील रोड शो सुरू करण्यापूर्वी पूर्व उत्तर प्रदेशच्या प्रभारी प्रियांका गांधी यांनी आपले ट्विटर अकाउंट सुरू केले आहे. ट्विटरवर एकही ट्विट न करता सुरू करण्यात आलेले हे ट्विटर अकाउंट व्हेरिफाइ़ड आहे. विशेष म्हणजे काही मिनिटांतच प्रियांकांच्या फॉलोअर्सची संख्या २ हजारांवर पोहोचली आहे.

प्रियांका आतापर्यंत सक्रिय राजकारण आणि सोशल मीडियापासून दूरच होत्या. काही दिवसांपूर्वी त्यांच्या खांद्यावर महासचिव पद आणि पूर्व उत्तर प्रदेशच्या प्रभारीपदाची जबाबदारी सोपवण्यात आली. या राजकीय एंट्री नंतर आता त्यांची सोशल मीडियावर दमदा एंट्री झाली आहे. गेल्या काही दिवसांमध्ये काँग्रेस अध्यक्ष राहुल गांधी यांची सोशल मीडियावर सक्रियता वाढली आहे. त्यांच्या प्रमाणेच प्रियांका देखील पंतप्रधान मोदी यांच्यावर ट्विटरद्वार निशाणा साधणार असे बोलले जात आहे.


उत्तर प्रदेशातील रोड शोसह प्रियांका कार्यकर्त्यांनाही भेटणार आहेत. पुढील महिनाभर त्या विविध भागांचा दौरा करून त्या राजकीय स्थितीचा आढावा घेणार आहेत. प्रियांकाच्या रोड शोच्या आयोजनामुळे यूपीतील कार्यकर्त्यांमध्ये उत्साह संचारलेला दिसत आहे. काही पोस्टर्सवर तर प्रियांकांना दुर्गेच्या रुपात दाखवण्यात आले आहे.


लखनऊ विमानतळ ते काँग्रेस प्रदेश मुख्यालयापर्यंतचा प्रियांकांचा हा १७ किमीचा रोड शो आहे. काँग्रेस नेते आणि कार्यकर्त्यांसह लखनऊमधील स्थानिकांमध्येही रोड शोबाबतचा उत्साह पाहायला मिळत आहे. रोड शोसाठी खास बस तयार करण्यात आली आहे. ही बस काँग्रेससाठी लकी असल्याचे सांगितले जात आहे.