लष्कराचं लष्कराला ठरवू द्या: जेटली

मटा ऑनलाइन वृत्त । नवी दिल्ली

एखादी स्थिती कशी हाताळायची, हे लष्कराचं लष्करालाच ठरवू द्या, असे सांगत संरक्षण मंत्री अरुण जेटली यांनी आज मेजर गोगोई यांच्या कृतीचं समर्थन केलं. मंत्रिमंडळ बैठकीनंतर जेटली माध्यमांशी बोलत होते. यावेळी त्यांना काश्मीरमधील दगडफेकीच्या घटना आणि मेजर गोगोई यांच्या सन्मानाबाबत विचारले असता त्यांनी लष्कराला 'फ्री हँड' देण्यावर जोर दिला.

काश्मीरमध्ये पोटनिवडणुकीदरम्यान हिंसाचार उसळला होता. तेव्हा दगडफेक करणाऱ्या समाजकंटकांना रोखण्यासाठी मेजर गोगोई यांनी एका दगडफेकखोराला जीपच्या बोनेटवर बांधून त्याची मानवी ढाल केली होती. या मेजरचा नुकताच लष्कराने सन्मान केल्याने त्यावरून उलटसुलट प्रतिक्रिया उमटत आहेत. या पार्श्वभूमीवर एखादी स्थिती कशा हाताळायची याचा निर्णय लष्करालाच घेऊ द्या, असा टोला जेटली यांनी टीकाकारांना लगावलाय.