बलात्कारी राम रहीम तुरुंगात सारखा रडतो आहे

मटा ऑनलाइन वृत्त। मुंबई

२० वर्षांची शिक्षा ठोठावल्यानंतर बाबा राम रहीमसाठी पहिली रात्र मोठी भीतीदायक आणि अस्वस्थ करणारी गेली. बाबा रात्रभर आपल्या बराकीत येरझाऱ्या घालत होता. ना तो कुणाशी बोलला, ना कसला संकेत दिला. बाबाने ना रात्री जेवण घेतले नाही पहाटे काही खाल्ले. राज महालासारख्या वैभवाला पारखा झालेल्या बाबाला तुरुंगातील वास्तव्य काट्यासारखे टोचत असून बाबा तुरुंगातील गजांवर डोके टेकून रडतो आहे.

बाबाच्या बराकीत आणखी दोन कैदी कैद आहेत. याचे कारण म्हणजे या तुरूंगाच्या क्षमतेपेक्षा कैद्यांची संख्या अधिक आहे. या तुरूंगाची क्षमता आहे १३०० कैद्यांची आणि तुरूंगात सध्याची कैद्यांची संख्या आहे १३४५. प्रत्येक बराकीत दोन ते तीन कैदी आहेत. तुरुंगातील केवळ दोनच बराकीत एसी आणि फिल्टर वॉटरची व्यवस्था आहे. परंतु, या दोन बराकी अगोदरच मोठ्या कैद्यांना देण्यात आल्या आहेत. मात्र काही दिवसांतच बाबा राम रहीमला दोनपैकी एका बराकीत हलवण्यात येणार आहे. तथापि, काही झाले तरी बाबाला आपली बराक दुसऱ्या कैद्याबरोबर शेअर करावीच लागणार आहे.

बाबाला शिक्षा ठोठावल्यानंतर बाबाच्या पहिल्या रात्रीबाबत जाणून घेण्यासाठी तुरुंग अधीक्षक सुनील सांगवान यांच्याशी संपर्क साधला असता त्यांनी यावर बोलण्यास नकार दिला. दुसऱ्या दिवशी सकाळी देखील बाबा तुरुंगात गजाआड उभा राहून रडत होता अशी माहिती सूत्रांनी दिली आहे. बाबा गजांवर आपले डोके टेकून उभा असल्याचे आपण पहाटे साडे सहा वाजता पाहिल्याचे एका शिपायाने सांगितले अशी माहिती सूत्रांनी दिली.

शिपाई भोजन घेऊन आला होता

काल रात्री १० वाजता शिपाई बाबासाठी जेवण घेऊन आला. थाळीत डाळ, भाजी, ४ चपात्या आणि मीठ होते. बाबाने जेवण घेतलेच नाही. त्यानंतर तासाभराने शिपाई दूध आणि ब्रेड घेऊन आला. मात्र बाबाने दूध देखील घेतले नाही. आज सकाळी पुन्हा एक शिपाई बाबासाठी दूध आणि ब्रेड घेऊन आला. मात्र बाबाने सकाळीही ते घेतले नाही. तुरुंग प्रशासनाने दिलल्या माहितीनुसार आजपासून बाबाला जेवण घेण्यासाठी इतर कैद्यांप्रमाणे मेसपर्यंत जावे लागणार आहे.

तुरुंग, ज्यात बाबा कैद आहे

बलात्कारी बाबा ज्या तुरुंगात आहे, त्यात रोहतक, सोनीपत, झज्जर आणि बहादूरगडचे कैंदी कैद आहेत. माजी मुख्यमंत्री भूपेंद्र हुड्डा यांच्या कार्यकालात १५ एप्रिल २०१२ ला या तुरुंगाचे उद्घाटन झाले होते. सुमारे १०५ एकर भागात तुरुंग वसले आहे. यात एक पोलीस प्रशिक्षण केंद्र देखील आहे. याव्यतिरिक्त इथे एक व्हीआयपी गेस्ट हाऊस देखील आहे. याच व्हीआयपी गेस्ट हाऊसमध्ये बाबाला ठेवण्यात आल्याच्या तसेच त्याला व्हीआयपी ट्रीटमेंट दिल्या जाण्याबाबतची माहिती पुढे आली होती.

या तुरुंगात १२८२ पुरूष कैदी, तर ६३ महिला कैदी आहेत. यांपैकी ४०१ कैद्यांना जन्पठेपेची शिक्षा ठोठावण्यात आली आहे.