वृत्तसंस्था, नवी दिल्ली
'करोनावरील संभाव्य लशींच्या मानवी वैद्यकीय चाचण्यांना कॅनडात परवानगी देण्यात आली आहे,' अशी माहिती पंतप्रधान जस्टिन ट्रूड्यू यांनी दिली. कॅनडाच्या आरोग्य मंत्रालयाने डलहौसी विद्यापीठातील कॅनेडियन सेंटर फॉर व्हॅक्सिनोलॉजीला ही परवानगी दिल्याचे वृत्त एका इंग्रजी वृत्तपत्राच्या संकेतस्थळाने दिले आहे.
'या चाचण्या यशस्वी झाल्यास आपल्याला या लशीचे उत्पादन इथेच (देशात) करता येईल आणि घरोघरी वाटप करता येईल. संशोधन आणि विकास याला वेळ लागतो, ते अचूकच होणे आवश्यक आहे, पण आलेली बातमी नक्कीच उत्साहवर्धक आहे,' असे ट्रूड्यू यांनी म्हटले आहे.
इस्रायलमध्ये संरक्षण मंत्रालयाच्या प्रयोगशाळेत करोनावरील प्रायोगिक लशीची चाचणी उंदरांवर नुकतीच घेण्यात आली. मानवी चाचण्यांकडे वळण्याआधी दी इस्रायल इन्स्टिट्यूट फॉर बायोलॉजिकल रीसर्च इतर प्राण्यांवरही या प्रायोगिक लशीची चाचणी करणार आहे.
'लकी स्ट्राइक 'या ब्रँडने उत्पादन करणाऱ्या ब्रिटिश अमेरिकन कंपनी या तंबाखू उत्पादक कंपनीनेही करोना प्रतिबंधक लस विकसित केल्याचा दावा केला आहे.
ब्रिटनमधील प्रयोग आघाडीवर
ऑक्सफर्ड विद्यापीठाने 'चॅडॉक्स वन' नावाची प्रायोगिक लस विकसित केली आहे. सध्या लंडन आणि ब्रिस्टल, ऑक्सफर्ड आणि साउदम्प्टन येथील प्रयोगशाळांमध्ये ११०२ व्यक्तींवर या प्रायोगिक लशीची मानवावरील वैद्यकीय चाचणी सुरू आहे.
संशोधक कंपन्या/संस्था
मॉडर्ना, ऑक्सफर्ड विद्यापीठ, नोव्हाव्हॅक्स, फायझर, सिनोव्हॅक, कॅनसिनो, सॅनफी पाश्चर, इनोव्हिओ, जॉन्सन अँड जॉन्सन.
'कदाचित लस सापडणारही नाही'
लंडन : 'कदाचित ब्रिटनला करोनावरील लस कधीही विकसित करता येणार नाही,' असा निराशेचा सूर ब्रिटनचे व्यापारमंत्री आलोक शर्मा यांनी लावला आहे. सध्या लस विकसित करण्यात सर्वांत आघाडीवर दोन ब्रिटिश संस्थाच असल्या, तरीही ब्रिटिश मंत्र्यांनी हे विधान केले आहे. 'करोनावरील लस विकसित करण्यात आघाडीच्या दोन्ही संस्था ऑक्सफर्ड विद्यापीठ आणि इम्पिरिअर कॉलज लंडन या ब्रिटनमधीलच आहेत. आपले संशोधक अविश्रांत परिश्रम करीत आहेत. तरीही, कदाचित आपल्याला लस विकसित करण्यात अपयश येऊ शकते,' असे शर्मा यांनी दैनंदिन पत्रकार परिषदेत सांगितले.
डॉक्टरांना स्वत:च्या आरोग्याची चिंता
ब्रिटनमधील निम्म्याहून अधिक डॉक्टरांना स्वत:च्या आरोग्याची चिंता भेडसावत आहे, असे रॉयल कॉलेज ऑफ फिजिशियन्सनने केलेल्या पाहणीत दिसले आहे. या कॉलेजचे अध्यक्ष प्रा. अँड्र्यू गोडार्ड म्हणाले, 'राष्ट्रीय आरोग्य सेवेसाठी सध्याचा काळ सर्वांत वाईट आहे. या पाहणीतून हॉस्पिटलांमधील डॉक्टरांच्या अवस्थेवर प्रकाश पडला आहे. पीपीई किटचा तुटवडा ही अत्यंच चिंतेची बाब आहे. गेल्या तीन आठवड्यांत तर या किटचा पुरवठा आणखी कमी झाला आहे.'
२,४३,३०३
ब्रिटनमधील करोनाबाधित
३४,६३६
आतापर्यंत झालेले मृत्यू
३१४२
शनिवारी एका दिवसात वाढलेले रुग्ण