हैदराबादच्या महिलेला ३ लाखांत विकले!

हैदराबाद: येथील एका महिलेला सौदी अरेबियामध्ये ३ लाख रुपयांच्या बदल्यात विकल्याची धक्कादायक बाब समोर आली आहे. सलमा बेगम असे या महिलेचे नाव असून घरकामाच्या नावाखाली दोन एजंट्सनी या महिलेचा सौदा केला आहे. या महिलेने तिच्यावर होत असलेल्या अत्याचाराबाबत मेसेज पाठवून आपल्या मुलीला कळवले असून तिने तेलंगण सरकार आणि केंद्र सरकारकडे मदतीसाठी धाव घेतली आहे.

सलमा बेगमची मुलगी समीना हैदराबादमधील बाबानगर भागात राहते. सलमाची कशाप्रकारे फसवणूक करण्यात आली हे तिने सांगितले. अक्रम आणि शफी नावाच्या एजंटमार्फत माझी आई सौदीत गेली. मात्र तिथे तिचा शारीरिक आणि मानसिक छळ केला जात आहे. तिला घरी परतायचे आहे पण तिचा काफील (प्रायोजक) तिला परवानगी देत नाहीय, असे समीनाने सांगितले. अक्रमला भेटून मी आईला परत आणण्याबाबत सांगितले मात्र तो काहीच ऐकायला तयार नाही. कांचनबाग पोलीस ठाण्यात जाऊन मी अक्रम आणि शफीची तक्रार केली मात्र पोलिसांनीही कोणतीच कारवाई केली नाही. २० फेब्रुवारीपर्यंत माझ्या आईला परत आणतो, असे त्याने पोलिसांसमक्ष सांगितले होते मात्र ही निव्वळ धूळफेक होती, असे समीनाने सांगितले.

समीनाच्या म्हणण्यानुसार, तिच्या आईला ३ लाख रुपयांत विकण्यात आले आहे. काफीलसोबत 'कॉन्ट्रॅक्ट मॅरेज' करण्यास नकार दिल्यानंतर माझ्या आईचा छळ सुरू झाला आहे. याबाबत मेसेज पाठवून तिने मला माहिती दिली. तिने एक ऑडिओ मेसेजही पाठवला असून त्यात केंद्र सरकारने आपणास मदत करावी, अशी विनवणी तिने केली आहे.

दरम्यान, गल्फ को-ऑपरेशन कौन्सिलचे (जीसीसी) सदस्य देश असलेल्या कुवेत, ओमान, कतार, सौदी अरेबिया आणि संयुक्त अरब अमिराती या देशांमध्ये 'काफील' ही व्यवस्था आहे. यानुसार परदेशातून कामासाठी येणाऱ्या लोकांना स्थानिक नागरिक वा कंपनीने स्पॉन्सर करणे आवश्यक असते. संबंधित व्यक्तीने कोणते आणि कुठे काम करायचे हे सगळं या काफीलवर अवलंबून असतं. याचाच गैरफायदा घेऊन अनेक जणांचं शोषण केलं जातं. काफील हा एकप्रकारे तुमचा मालकच असतो. त्याच्या परवानगीशिवाय तुम्ही देश सोडू शकत नाही.

ही बातमी इंग्रजीत वाचा...