मुलाचं नाव राम ठेवू शकत नाही : सैफ अली खान

मटा ऑनलाइन वृत्त । नवी दिल्ली

तैमूरच्या नावावरून सुरू असलेल्या वादावर अभिनेता सैफ अली खान यानं पुन्हा एकदा भाष्य केलं आहे. जगभर काही प्रमाणात इस्लामोफेोबिया आहे. त्याची मला जाणीव आहे, पण मुस्लिम म्हणून आपण त्याची जबाबदारी नाही घेणार तर कोण घेणार? असं सांगतानाच मी माझ्या मुलाचं नाव अलेक्झांडर किंवा राम नाही ठेवू शकत. पण एक चांगल मुस्लिम नाव ठेवलं तर त्यात वाईट काय?, असा सवाल सैफनं केला.

एका खासगी वृत्तवाहिनीला दिलेल्या मुलाखतीत सैफनं ही भूमिका मांडली. तो म्हणाला, एखादं चांगलं मुस्लिम नाव मुलाचं ठेवलं तर बिघडलं कुठं? उलट असं नाव ठेवून त्याला धर्मनिरपेक्षतेची शिकवण देता येईल. तो धर्मनिरपेक्ष वातावरणात वाढल्यानंतर त्याच्या संपर्कात येणाऱ्याला हा किती चांगला माणूस आहे, हे लोकांना समजून येईल. त्यामुळे त्याच्या नावाशी जोडलेला वादही संपुष्टात येईल.

तैमूर नावाचा एक क्रुर राज्यकर्ता होता हे मला माहित आहे. पण त्याचं नाव तिमूर होते आणि माझ्या मुलाचं नाव तैमूर आहे. हा फरक लोकांनी समजून घ्यायला हवा. दोन्ही नवात साधर्म्य वाटू शकत. कारण त्याची पाळेमुळे सारखीच आहे. पण नावात काय असतं? असं सांगतानाच अशोक आणि अलेक्झांडर ही दोन्ही नावेही हिंसकच आहेत, असंही तो म्हणाला.