नवी दिल्ली : रणनीतीसाठी देशभरात 'राजकीय चाणक्य' म्हणून प्रसिद्ध असलेले प्रशांत किशोर यांची कंपनी 'द इंडियन पॉलिटिकल अॅक्शन कमिटी' (आय-पॅक) दिल्लीच्या आगामी विधानसभा निवडणुकांसाठी आम आदमी पक्षासोबत काम करणार असल्याची घोषणा आम आदमी पक्षाचे नेते व मुख्यमंत्री अरविंद केजरीवाल यांनी शनिवारी 'ट्विटर'द्वारे केली. 'आय-पॅक आमच्याबरोबर आहे, हे सांगताना अत्यंत आनंद होत आहे. तुमचे स्वागत आहे,' अशा शब्दांत केजरीवाल यांनी 'ट्वीट' केले आहे. 'आय-पॅक' सध्या २०२१च्या विधानसभा निवडणुकीसाठी तृणमूल काँग्रेससोबत काम करीत आहे.
बादल यांची 'हॅटट्रिक'
अमृतसर : पंजाबचे माजी उपमुख्यमंत्री सुखबिरसिंग बादल यांची शिरोमणी अकाली दल पक्षाच्या अध्यक्षपदी पुन्हा एकदा एकमताने निवड करण्यात आली आहे. बादल यांची सलग तिसऱ्यांदा या पदावर निवड करण्यात आली. पक्षाचे ज्येष्ठ नेते तोता सिंग आणि प्रेमसिंग चंदूमाजरा यांनी बादल यांच्या नावाची शिफारस केली होती. शिरोमणी अकाली दलाचा ९९वा स्थापनादिन शनिवारी 'एसजीपीसी' संकुलातील तेजासिंग समुंदरी हॉल येथे साजरा करण्यात आला. या वेळी बादल यांची एकमताने अध्यक्षपदी निवड करण्यात आली.
दोघांकडून बलात्कार
मुजफ्फरनगर : सोळा वर्षांच्या मुलीचे दोन जणांनी अपहरण करून, नंतर तिच्यावर बलात्कार केल्याची घटना शनिवारी उत्तर प्रदेशमधील मुजफ्फरनगर येथे घडली आहे. पीडित मुलगी गुरुवारी बेपत्ता झाली होती. तिच्या वडिलांनी या प्रकरणी पोलिसांत तक्रार दिल्यानंतर पोलिसांनी शोध घेऊन शुक्रवारी पीडितेची सुटका केली असून, दोन जणांना अटक केली आहे. सलमान आणि परवेज अशी अटकेतील आरोपींची नावे असून, ते साधारण वीस वर्षांचे आहेत. त्यांच्यावर 'पोस्को' कायद्यांतर्गत गुन्हा दाखल करण्यात आला आहे, अशी माहिती पोलिसांनी दिली आहे.
उमर यांना कारावास
खार्तूम (सुदान) : मनी लाँडरिंग आणि भ्रष्टाचारप्रकरणी सुदानचे माजी अध्यक्ष उमर अल-बशीर यांना तेथील न्यायालयाने दोन वर्षांच्या कारावासाची शिक्षा सुनावली आहे. एप्रिलपासून त्यांना कोठडीत ठेवण्यात आले होते. बशीर यांच्यावर विविध प्रकरणी गुन्हे दाखल असून, त्या पैकी भ्रष्टाचारासाठी त्यांना दोन वर्षांची शिक्षा सुनावण्यात आली आहे. तसेच, दारफूर येथे झालेला नरसंहार आणि युद्धाबाबतची भूमिका यामुळे आंतरराष्ट्रीय न्यायालयातदेखील बशीर यांच्यावर खटला सुरू आहे.
कोरियाकडून पुन्हा चाचणी
सोल : उत्तर कोरियाने आणखी एका शक्तिशाली क्षेपणास्त्राची यशस्वी चाचणी शुक्रवारी घेतली. सोहे या उप्रगह प्रक्षेपण स्थळावरून उत्तर कोरियाने ही चाचणी घेतली. या पूर्वी सात डिसेंबरला कोरियाने क्षेपणास्त्रचाचणी घेतली होती. त्यानंतर आठ दिवसांतच पुन्हा चाचणी घेण्यात आली आहे. अमेरिकेचे विशेष प्रतिनिधी स्टीफन बेगन यांच्या सोल येथील तीन दिवसांच्या दौऱ्याच्या एक दिवस आधी कोरियाने चाचणी घेतल्याचे जाहीर केले आहे, तर दुसरीकडे अमेरिकेने गुरुवारी मध्यम पल्ल्याच्या बॅलेस्टिक क्षेपणास्त्राची चाचणी घेतली आहे.