नवी दिल्लीः ज्येष्ठ अभिनेते आणि भाजप खासदार शत्रुघ्न सिन्हा चैत्र पाडव्याचा मुहुर्त साधत काँग्रेस पक्षात प्रवेश करणार आहेत. काँग्रेस अध्यक्ष राहुल गांधी यांच्या भेटीनंतर सिन्हा यांनी ही माहिती दिली. चैत्र नवरात्र उत्तर भारतात शुभ मानले जाते. त्यामुळे शुभकार्याची सुरुवात ६ एप्रिल रोजी करणार असल्याचे सिन्हा यांनी सांगितले. बिहारमधील पाटणा साहिब लोकसभा मतदारसंघातूनच निवडणूक लढवणार असल्याचा पुनरुच्चार सिन्हा यांनी केला आहे. सिन्हा यांच्या काँग्रेस प्रवेशाबाबत अनेक तर्क लावले जात होते. मात्र, राहुल गांधी यांच्या भेटीनंतर पाडव्याच्या मुहुर्तावर सीमोल्लंघन करणार असल्याचे सिन्हा यांनी स्पष्ट केले. लोकसभा मतदारसंघाबाबत चर्चा करण्यासाठी सिन्हा राहुल गांधी यांच्या निवासस्थानी गेले होते, अशी माहिती सूत्रांकडून देण्यात आली आहे. भाजपच्या तिकिटावरून पाटणा साहिब मतदारसंघातून विजयी झालेल्या सिन्हा यांनी याच मतदारसंघातून निवडणूक लढवण्याचा हट्ट धरला आहे. परंतु, काँग्रेसकडून सिन्हा यांना स्पष्टपणे कोणतेही आश्वासन देण्यात आलेले नाही.
दरम्यान, बिहार काँग्रेसचे प्रभारी शक्ती सिंह गोहिल यांनी सांगितले की, शत्रुघ्न सिन्हा यांनी काँग्रेस पक्षात प्रवेश करण्याचा निर्णय घेतला आहे. काँग्रेसकडून ते स्टार प्रचारक आणि स्टार नेता म्हणून निवडणूक लढतील, असे ते म्हणाले.
दरम्यान, बिहार काँग्रेसचे प्रभारी शक्ती सिंह गोहिल यांनी सांगितले की, शत्रुघ्न सिन्हा यांनी काँग्रेस पक्षात प्रवेश करण्याचा निर्णय घेतला आहे. काँग्रेसकडून ते स्टार प्रचारक आणि स्टार नेता म्हणून निवडणूक लढतील, असे ते म्हणाले.