‘ना बैठूंगा, ना बैठने दूंगा’

‘२०१९’साठी मोदींची नवी घोषणा

म. टा. विशेष प्रतिनिधी, नवी दिल्ली

उत्तर प्रदेशसह पाच राज्यांतील विजयाच्या पार्श्वभूमीवर ‘ना बैठूंगा, ना बैठने दूंगा,’ अशा नव्या घोषणेसह पंतप्रधान नरेंद्र मोदी यांनी गुरुवारी सन २०१९च्या लोकसभा निवडणुकीसाठी भाजप खासदारांना प्रेरित केले. संसद भवनात झालेल्या संसदीय पक्षाच्या बैठकीत मोदी यांनी ‘२०१९’चे लक्ष्य देत पक्षाच्या खासदारांना अविरत काम करण्याचे आवाहन केले.

पाच राज्यांतील निवडणुकांतील विजयांमुळे बैठकीत उत्साहाचे वातावरण होते. बैठकीत दाखल झालेल्या पंतप्रधानांचे जोरदार स्वागत करण्यात आले आणि तिरुपतीचे लाडू वाटून विजय साजरा करण्यात आला.

येत्या ६ एप्रिल रोजी भाजपचा स्थापना दिवस तसेच १४ एप्रिलच्या डॉ. बाबासाहेब आंबेडकर जयंतीदरम्यान आठवडाभर चालणाऱ्या कार्यक्रमांची रूपरेषा या बैठकीत मांडण्यात आली. उत्तर प्रदेशच्या निवडणुकीत भाजपला मोठ्या प्रमाणावर दलित मते मिळाल्याचे मानले जात आहे. त्यामुळे दलित मतदारांच्या सतत संपर्कात राहण्याच्या सूचना सर्व खासदारांना देण्यात आल्या. भाजपच्या स्थापना दिवसापासून आंबेडकर जयंतीपर्यंत प्रत्येक पंचायत आणि वार्डात कार्यक्रमांचे आयोजन करून डॉ. आंबेडकर यांचे काम आणि योगदानाचा प्रचार करण्याचे, भीम अॅपच्या वापराला प्रोत्साहन देण्याचे तसेच स्वच्छ भारत मोहीम राबविण्याचे निर्देशही यावेळी देण्यात आले आहेत. युवकांना सरकारच्या कामांचे दूत बनविण्यात यावे, असे मत मोदींनी व्यक्त केले, तर राज्यांमध्ये विजय संपादन केल्यानंतर आता लोकसभा निवडणूक भाजपसाठी पुढचे आव्हान असल्याचे राष्ट्रीय अध्यक्ष अमित शहा यांनी स्पष्ट केले.