'...तर मला राज्यसभेत राहण्याचा अधिकार नाही'

मटा ऑनलाइन वृत्त । नवी दिल्ली

'मी ज्या समाजातून आलेय, ज्या समाजाचे मी प्रतिनिधीत्व करतेय, त्या समाजाच्या हिताचे प्रश्न जर मला राज्यसभेत मांडता येत नसतील तर मला राज्यसभेत राहण्याचा अधिकार राहत नाही', असा आक्रमक पवित्रा आज बसपा अध्यक्षा मायावती यांनी राज्यसभेत घेतला.

आजपासून संसदेच्या पावसाळी अधिवेशनाला सुरुवात झाली. राज्यसभेचे कामकाज सुरू होताच विरोधकांनी सरकारला धारेवर धरले व चांगलाच गदारोळ केला. बसपा अध्यक्षा मायावती यांनी सहारनपूरचा मुद्दा राज्यसभेत उपस्थित केला. सहारनपूरमधील दलित हत्याकांडामागे भाजपचा हात असून हा भाजपचाच कट आहे. भाजपने या सर्व प्रकारावर पडदा टाकण्याचा प्रयत्न केला, असा आरोप मायावती यांनी राज्यसभेत केला. मायावती यांनी सहारनपूरमधील मुद्दा उपस्थित केल्यानंतर उपसभापतींनी मायावती यांना बोलण्यापासून रोखले, त्यानंतर मायावती फारच आक्रमक झाल्या. मी ज्या समाजाचे प्रतिनिधीत्व करीत आहे, त्या समाजाचे प्रश्न मी राज्यसभेत मांडू शकणार नसेल तर मला राज्यसभेत राहण्याचा अधिकार नाही. मी राज्यसभा सदस्यत्वाचा राजीनामा देते, अशी धमकी मायावती यांनी राज्यसभेत दिली.

Let me speak or I will resign: BSP chief Mayawati in Rajya Sabha. #MonsoonSession pic.twitter.com/8CwlAqDfnB — TIMES NOW (@TimesNow) July 18, 2017
सभागृहात मायावती यांनी दलितांचा मुद्दा उपस्थित केल्यानंतर काँग्रेसचे गुलाम नबी आझाद यांनीही हा मुद्दा चांगलाच उचलून धरला. दलित, शेतकरी आणि अल्पसंख्याक समाजावर सध्या सामूहिक हल्ले होत आहेत. सरकारला हे सर्व करण्यासाठीच बहुमत मिळाले असेल तर आम्ही सरकारसोबत नाही, असे गुलाम नबी आझाद म्हणाले. दरम्यान, केंद्रातील सरकार हे दलितविरोधी आहे, अशी जोरदार घोषणाबाजी विरोधकांनी राज्यसभा सभागृहात केली.