मला माझ्या देशाबद्दल चिंता

वृत्तसंस्था, अजमेर

ज्येष्ठ अभिनेते नासिरुद्दीन शाह यांनी असहिष्णुतेसंबंधी केलेल्या आपल्या विधानाचे शुक्रवारी समर्थन केले. 'माझ्या देशाबद्दल बोलताना मला वाटत असलेली चिंता मी व्यक्त केली होती. असे कोणतेही विधान मी केलेले नाही, ज्याबद्दल लोकांनी मला गद्दार ठरवावे,' या शब्दांत नासिरुद्दीन शाह यांनी आपली भावना मांडली.

अजमेर येथे एका कार्यक्रमासाठी आलेले ६८ वर्षी नासिरुद्दीन शाह यांना त्यांच्या विधानाबाबत विचारले असता त्यांनी हे उत्तर दिले. 'आपल्या देशात पोलिसाच्या हत्येपेक्षा गोहत्या अधिक महत्त्वाची ठरली,' असे विधान नासिरुद्दीन शाह यांनी केल्याबाबतचा एक व्हिडीओ गुरुवारी समोर आला होता. अशा वातावरणात मला माझ्या मुलांचा विचार केला की, चिंता वाटते, अशी टिपण्णी नासिरुद्दीन यांनी केली होती.

उत्तर प्रदेशातील बुलंदशहर येथे झुंडीच्या हिंसाचारात पोलिसाचा मृत्यू झाल्याबद्दल आपली भावना व्यक्त करताना नासिरुद्दीन यांनी हे विधान केले होते. गुरुवारी हा व्हिडिओ समोर आल्यानंतर त्यावरून मोठा वाद निर्माण झाला होता. बुलंदशहर येथे गोहत्येच्या संशयावरून उसळलेल्या हिंसाचारात पोलिस निरीक्षक सुबोध कुमार यांच्यासह सुमीत कुमार या विद्यार्थ्याचाही मृत्यू झाला होता.

नासिरुद्दीन यांनी याआधी क्रिकेटर विराट कोहली याला 'गर्विष्ठ' असे संबोधल्याने वाद निर्माण झाला होता. यावर बोलताना नासिरुद्दीन म्हणाले, 'आता कोणी असेही म्हणेल की, विराट कोहलीवर टीका करण्यासाठी मला ऑस्ट्रेलियाच्या संघाने सांगितले होते. जर त्यांना टीका करण्याचा हक्क आहे, तर मलाही आहे. मी माझ्या देशाबद्दल बोलतोय, जे माझे घर आहे, ज्यावर माझं अपार प्रेम आहे, त्याबद्दल बोलतोय, मला वाटणारी चिंता व्यक्त करतोय,' असे नासिरुद्दीन शाह म्हणाले.