चंडिगड : भारतीय हवाई दलाने मंगळवारी चंडिगड हवाई तळावरून लडाख येथील हवाई दलाच्या विविध तळांवर एकाच फेरीत विक्रमी ४६३ टन माल उतरवण्यात आला. आणीबाणीच्या क्षणी हवाई दलाची माल वाहून नेण्याची क्षमता याद्वारे तपासली गेली. या मोहिमेमध्ये सोळा मालवाहू विमाने सहभागी झाली. त्यात सी-१७ ग्लोबमास्टर, इल्युशिन-७६ गजराज आणि मध्यम क्षमतेचे डावपेचात्मक मालवाहू विमान एएन-३२ यांचा समावेश होता. अवघ्या सहा तासांत ही मोहीम पूर्ण झाली. पश्चिम हवाई कमांडतर्फे ही मोहीम आखली गेली होती. पश्चिम हवाई कमांडचे एअर मार्शल एन. जे. एस. धिल्लन म्हणाले, 'हवाई दलाची चपळता हा आधुनिक युद्धातील महत्त्वाचा घटक आहे. मोठ्या युद्धाच्या वेळी याचे महत्त्व अधोरेखित होते. भारताच्या बाबतीत ही बाब अत्यंत महत्त्वाची आहे. लडाख प्रांतात तर ती अधिकच महत्त्वाची ठरते. हवाई दलाकडे आज माल वाहून नेण्याची विश्वासार्ह अशी क्षमता आहे.'
माल वाहण्यात हवाई दलाचा विक्रम
भारतीय हवाई दलाने मंगळवारी चंडिगड हवाई तळावरून लडाख येथील हवाई दलाच्या विविध तळांवर एकाच फेरीत विक्रमी ४६३ टन माल उतरवण्यात आला. आणीबाणीच्या क्षणी हवाई दलाची माल वाहून नेण्याची क्षमता याद्वारे तपासली गेली.
Maharashtra Times 19 Dec 2018, 3:22 am