'मी जिंकलो तर मुस्लिम भागात कर्फ्यू लागेल'

मटा ऑनलाइन वृत्त । शामली (यूपी)

मुस्लिम मतं खेचण्यासाठी समाजवादी पक्ष व काँग्रेस एकत्र आल्यानंतर भाजपकडूनही उत्तर प्रदेशात ध्रुवीकरणाच्या राजकारणाला सुरुवात झाली आहे. भाजपचे एक उमेदवार व २०१३च्या मुझफ्फरनगर दंगलीतील आरोपी सुरेश राणा यांनी वादग्रस्त वक्तव्य करून याची चुणूक दाखवली आहे. 'मी निवडणूक जिंकलो तर कैराना, मुरादाबाद व देवबंद या मुस्लिमबहुल भागात संचारबंदी लागेल,' असं राणा यांनी म्हटलं आहे. त्यामुळं वातावरण तापण्याची चिन्हं आहेत.

एका निवडणूक प्रचारसभेला संबोधित करताना राणा बोलत होते. 'निवडणुकीत माझा पराभव झाला तर 'राणाचा बंदोबस्त केला' म्हणून देवबंदमध्ये जल्लोष केला जाईल. पण मी जिंकलो तर देवबंद, मुरादाबादेत संचारबंदी लागू होईल,' असं राणा म्हणाले. देवबंद, मुरादाबाद या मुस्लिमबहुल भागांतून हिंदूंना आपली घरं सोडून पलायन करावं लागल्याचा आरोप राणा यांनी यापूर्वी केला होता.

#WATCH: BJP MLA Suresh Rana says that if he wins, curfew will be imposed in Kairana, Deoband and Moradabad. pic.twitter.com/YYlsv0fxTm — ANI UP (@ANINewsUP) January 30, 2017 राणा हे उत्तर प्रदेश भाजपचे उपाध्यक्ष असून ते शामली येथून थानाभवन मतदारसंघातून निवडणूक लढवत आहेत. राणा प्रचारसभेला संबोधित करत असताना मुझफ्फरनगरचे खासदार संजीव बालियान हेही व्यासपीठावर उपस्थित होते. बालियान हेही मुझफ्फरनगरमध्ये झालेल्या दंगलीतील एक आरोपी आहेत.