तीन शैक्षणिक संस्थांच्या वेबसाइट हॅक

मटा ऑनलाइन वृत्त । नवी दिल्ली

दिल्ली विद्यापीठ, अलीगढ मुस्लिम विद्यापीठ आणि आयआयटी दिल्ली या शैक्षणिक संस्थांच्या वेबसाइट पाकिस्तानी हॅकर्सने हॅक केल्याने खळबळ उडाली. हॅकर्सनी वेबसाइटमध्ये घुसखोरी करून होमपेजवर एक संदेश सोडला आहे. काश्मीरमध्ये तैनात असलेल्या सैन्याविरोधात हा संदेश आहे. दरम्यान, काही वेळानंतर आयआयटी दिल्ली वगळता इतर दोन वेबसाइट्स रिस्टोर करण्यात आल्या आहेत.

'काश्मिरी जनतेला शांततेने जगण्याचा हक्क आहे. खूनी आणि बलात्काऱ्यांना आपल्या घरी परत बोलवा. काश्मीरमधील लोकांच्या समर्थसाठी आम्ही वेबसाइट हॅक केली आहे', असा हा संदेश असून या संदेशाच्या शेवटी 'पाकिस्तान जिंदाबाद' असे लिहिण्यात आले आहे. हॅकर्सने स्वत: पीएचसी ग्रुपचा सदस्य असल्याचे म्हटले आहे. या ग्रुपने गेल्यावर्षी ७ हजार १०० वेबसाइट्स हॅक केल्याचा दावा केला होता.