मी १०० टक्के हिंदू आहे; पण...!: सिद्दरामय्या

मटा ऑनलाइन वृत्त । म्हैसूर

'मी सुद्धा हिंदू आहे. १०० टक्के हिंदू आहे. माझं नावच 'सिद्ध राम' आहे. पण मी भाजपवाल्यांप्रमाणे लोकांमध्ये फूट पाडण्याचं काम करत नाही,' अशा शब्दांत कर्नाटकचे मुख्यमंत्री सिद्दरामय्या यांनी भाजपला फटकारलं आहे.

दक्षिण कर्नाटकमधील सध्याच्या धार्मिक तणावाच्या संदर्भात ते बोलत होते. हिंदुत्वाच्या मुद्द्यावर राजकारण करणाऱ्या भाजपवर सिद्दरामय्या यांनी यावेळी जोरदार हल्ला चढवला. आगामी विधानसभा निवडणुका डोळ्यापुढं ठेवून मतदारांमध्ये ध्रुवीकरण करण्याचा भाजपचा प्रयत्न आहे. भाजपचे काही नेते कर्नाटकचे दौरे करत आहेत. ते स्वत:ला 'विस्तारक' म्हणवून घेतात. त्याचा अर्थ काय? हे दुसरं-तिसरं काही नसून हिंदुत्वाच्या मुद्द्याचा विस्तार करण्याचं राजकारण आहे,' असं ते म्हणाले. 'उत्तर प्रदेशात मिळालेल्या यशाची पुनरावृत्ती भाजपला कर्नाटकात करायची आहे. पण कर्नाटकात ते होऊ दिलं जाणार नाही,' असं सिद्दरामय्या यांनी ठणकावलं.