सरकारी रुग्णालयांत सात रंगांच्या बेडशीट

मटा ऑनलाइन वृत्त । हैदराबाद

सरकारी रुग्णालयांत वापरल्या जाणाऱ्या बेडशीट्स नित्यनेमानं बदलल्या जाव्यात यासाठी सात दिवस सात रंगांच्या बेडशीट वापरण्याचा निर्णय तेलंगण सरकारनं घेतला आहे.

सरकारी रुग्णालयांमध्ये संसर्गजन्य आजार वाढल्याच्या असंख्य तक्रारी तेलंगण सरकारच्या आरोग्य विभागाकडं आल्या होत्या. रोजच्या रोज धुतल्या न जाणाऱ्या बेडशीट्स हे यामागचं एक प्रमुख कारण असल्याचं पुढं आलं होतं. तेलंगण सरकारनं याची गंभीर दखल घेतली असून सात दिवस सात वेगवेगळ्या रंगांच्या बेडशीट वापरण्याच्या सूचना दिल्या आहेत.

तेलंगणमध्ये प्राथमिक आरोग्य केंद्र, सुपर स्पेशालिटीसह विविध सरकारी रुग्णालयांमध्ये मिळून एकूण १९ हजारच्या आसपास बेड आहेत. या बेडसाठी सरकार हैदराबादेतील चेरलापल्ली तुरुंगातून २ लाख ६६ हजार बेडशीट खरेदी करणार आहे. तेलंगणचे गृहमंत्री नैनी नरसिम्हा रेड्डी यांनी नुकतीच चेरलापल्ली कारागृहात जिथं कैद्यांकडून बेडशीट्स, कारपेट्स व इतर वस्तू बनविल्या जातात, त्या कार्यशाळेला भेट दिली. त्यामुळं बेडशीटच्या खरेदी प्रक्रियेला वेग येण्याची शक्यता आहे.

केंद्रीय आरोग्य मंत्रालयाकडून 'एम्स'सह १९ महत्त्वाच्या रुग्णालयांत दरदिवशी नव्या बेडशीट पुरवल्या जातात. याच धर्तीवर तेलंगण सरकारनं हा निर्णय घेतल्याचं समजतं.