वृत्तसंस्था, कोइम्बतूर
काही व्यक्तींचा इस्लामिक स्टेट (आयएस) या संघटनेशी संबंध असल्याच्या संशयावरून केरळ व तमिळनाडूत सध्या सुरू असलेल्या चौकशीचाच एक भाग म्हणून राष्ट्रीय तपास एजन्सीने (एनआयए) गुरुवारी वेगवेगळ्या ठिकाणी छापे टाकले.
एर्नाकुलम येथील विशेष एनआयए न्यायालयाने जारी केलेल्या वॉरंटनुसार कोइम्बतूर परिसरात पाच ठिकाणी छापे टाकले. आयएसशी कथित संबंध असल्यावरून अटक करण्यात आलेल्या आरोपींच्या नीकटवर्तीयांची यावेळी चौकशीही करण्यात आली.
एनआयएने दिलेल्या माहितीनुसार, आयएसशी संबंध असल्याचा आरोप असलेल्या व्यक्तींशी संलग्न पाच जणांच्या घरांची या छाप्यांत झडती घेण्यात आली. यामध्ये एक लॅपटॉप, पाच मोबाइल फोन, चार सिमकार्डे, एक मेमरी कार्ड व आठ डीव्हीडी तसेच आक्षेपार्ह कागदपत्रे ताब्यात घेण्यात आली. यातील डिजिटल उपकरणांची फोरेन्सिक तपासणी करण्यात येणार असल्याचे एनआयएने म्हटले आहे.
आरोपींविरोधात एनआयएने यावर्षी मे महिन्यात केस दाखल केली होती. सोशल मीडियावर आयएस संकल्पनेचा प्रसार करणे आणि त्याद्वारे भारतातील तरुणांना आयएसचे सभासद करून घेणे, पुढे याचा उपयोग दक्षिण भारतात, विशेषतः केरळ व तमिळनाडूमध्ये आयएसचे हल्ले घडवून आणण्यासाठी करणे असे या अटक केलेल्या व्यक्तींवर आरोप आहेत. या आरोपींशी असलेल्या संबंधांबद्दल यावेळी संशयितांना विचारण्यात आले. एनआयएच्या म्हणण्यानुसार, काही आरोपी श्रीलंकेतील इस्टरच्या दिवशी झालेल्या बॉम्बस्फोटांचा सूत्रधार झहरन हाशिम याच्या संपर्कात होते.
श्रीलंकेहून सागरीमार्गाने लष्कर-ए-तय्यबाचे सहा दहशतवादी भारतात घुसले असून ते कोइम्बतूरसह वेगवेगळ्या शहरांत पांगले आहेत, असे अहवाल पोलिसांना प्राप्त झाले होते. त्यामुळे तमिळनाडूत सुरक्षा व्यव्सथा कडक करण्यात आली होती. या पार्श्वभूमीवर, एनआयएने टाकलेल्या छाप्यांना महत्त्व प्राप्त झाले आहे.