वृत्तसंस्था, नवी दिल्ली
मध्य प्रदेशचे मुख्यमंत्री कमलनाथ यांच्या निकटवर्तीयांवर प्राप्तिकर विभागाचे छापासत्र सोमवारीही सुरू होते. या कारवाईमध्ये कागदपत्रे आणि रोख रक्कम जप्त करण्यात आली आहे, अशी माहिती अधिकाऱ्यांनी दिली.
निवडणुकीच्या पार्श्वभूमीवर भोपाळ, इंदूर, दिल्ली आणि दिल्लीच्या परिसरामध्ये करचुकवेगिरी आणि हवाला व्यवहार मोठ्या प्रमाणात झाले असल्याचा आरोप आहे. यंत्रणा याचा माग काढत असून तपशील आणि पुरावे गोळा केले जात आहेत, अशी माहिती सूत्रांनी दिली.
जप्त केलेल्या रोख रकमेचा अचूक आकडा अद्याप उपलब्ध नसला, तरी सुमारे १० कोटी रुपयांहून अधिक रोकड आतापर्यंत जप्त करण्यात आल्याचे समजते.
हवाला एजंट असल्याचा आरोप असलेले पारसमल लोढा यांच्याशी संबंधित सुमारे १२ जणांची चौकशी करण्यात येत आहे. कमलनाथ यांच्याशी संबंध असलेल्या ५२ ठिकाणांवर प्राप्तिकर विभागाने रविवारी पहाटे छापे घातले.
या कारवाईत जप्त करण्यात आलेली रोकड निवडणुकीच्या प्रचारासाठी तसेच मतदारांना वाटण्यासाठी होती, अशी दाट शक्यता व्यक्त करण्यात आली आहे.
कमलनाथ यांचे 'ओएसडी'(ऑफिसर ऑन स्पेशन ड्युटी) प्रवीण कक्कर, माजी सल्लागार राजेंद्र मिगलानी, अश्वनी शर्मा, कमलनाथ यांच्या मेहुण्याची कंपनी 'मोझर बेयर' तसेच भाचा रतुल पुरी याच्या कंपनीचा छापा घातलेल्यांमध्ये समावेश आहे.
कमलनाथ याविषयी म्हणाले, 'प्राप्तिकराच्या छाप्यांविषयीची अद्याप स्पष्टता नाही. चित्र स्पष्ट झाल्यानंतर याविषयी बोलता येईल. पण गेल्या पाच वर्षांत घटनात्मक संस्थांचा कोणाविरुद्ध आणि कसा वापर केला गेला आहे, हे संपूर्ण देशाला माहिती आहे.'
प्रवीण कक्कड यांच्या भोपाळ येथील निवासस्थानावर सोमवारीही प्राप्तिकराने छापे टाकले.