रेड झोनमधून आल्याने घोड्याला केले होम क्वारंटाइन

राजौरीः जम्मू-काश्मीरच्या राजौरीमध्ये एका घोड्याला होम क्वारंटाइन करण्यात आलं आहे. करोनाच्या संकटामुळे देशात लॉकडाऊन सुरू आहे. या लॉकडाऊनच्या काळात हा घोडा शोपियानवरून मालकासह राजौरीत आला होता. यामुळे घोड्याला होम क्वारंटाइन करण्यात आलंय. घोड्याच्या मालकाला प्रशासनाच्या देखरेखीखाली क्वारंटाइन केलं गेलं आहे. घोड्याचा मालक आणि घोडा हे शोपियानमधून राजौरीत आले. आणि शोपियानला करोनाचा रेड झोन घोषित करण्यात आला आहे, अशी माहिती तहसिलदार अंजुम खान यांनी दिली.

शोपियानवरून ते रात्रीच्या वेळी राजौरीत दाखल झाले होते. याची माहिती आम्हाला मिळाली. शोपियान रेड झोन असल्याने घोड्याच्या मालकाला प्रशासनाच्या देखरेखीखाली क्वारंटाइन करण्यात आलं आहे. पण घोड्याला कुठे ठेवायचं? असा प्रश्न आमच्या समोर होता. पण पशुपालन विभागाच्या टीमच्या मदतीने घोड्याची तपासणीही केली. घोड्याच्या मालकाच्या स्वॅबचे नमुने करोना चाचणीसाठी पाठवण्यात आले आहेत. या चाचणीचा रिपोर्ट येत नाही तोपर्यंत घोड्याला होम क्वारंटाइन करण्यात आलं आहे, अशी माहिती खान यांनी दिली.

घोड्याला इतर जनावरांपासून आणि माणसांपासून दूर ठेवा अशा कडक सूचना आम्ही संबंधित कुटुंबाला दिल्या आहेत, असंही खान म्हणाल्या. घोड्यामुळेही माणसाला करोनाचा संसर्ग होऊ शकतो, अशी नागरिकांमध्ये भीती आहे. जनावरांमध्ये करोना व्हायरस आढळतो. पण त्याचा संसर्ग माणसांना होत नाही. तो फक्त जनावरांनाच होतो, असं अॅनिमल व्हेटर्नरी विभागातील डॉक्टर इम्तियाज अंजुम यांनी सांगितलं. घोड्याला करोनाचा संसर्ग झालेला नाही. पण त्याला २८ दिवसांसाठी होम क्वारंटाइन करण्यात आलं आहे. जर घोड्याचा मालक करोना पॉझिटिव्ह आढळून आला तर घोड्यालाही करोना होऊ शकतो. यामुळे आम्ही घोड्याला अॅन्टीबायोटिक्सची औषधं दिली आहेत, असं डॉक्टर अंजुम म्हणाले.

करुण कहाणी; स्टेशनवर मरण पावलेल्या आईला उठवण्याचा चिमुकल्याचा प्रयत्न

श्रमिक ट्रेन चालवण्यात रेल्वे मंत्रालयाची मनमानी, ममतांचा आरोप

PPE किट घोटाळा; हिमाचलच्या भाजप प्रदेशाध्यक्षांचा राजीनामा

जम्मू-काश्मीरमध्येही करोना रुग्णांची संख्या वाढत आहे. राज्यातील करोना रुग्णांची संख्या बुधवारी १७५९ इतकी झालीय. यापैकी ८३३ जण करोनामुक्त झाले आहेत.