लालूंचाही नोटाबंदीला पाठिंबा; विरोधकांना धक्का

मटा ऑनलाइन वृत्त । पाटणा

पंतप्रधान नरेंद्र मोदी यांच्या नोटाबंदीच्या निर्णयाविरोधात आक्रोश करणाऱ्या विरोधकांचा आवाजच क्षीण झाला आहे. मोदींचे कट्टर विरोधक व बिहारचे मुख्यमंत्री नितीश कुमार यांच्या पावलावर पाऊल ठेवून त्यांचे 'राजकीय मित्र' लालूप्रसाद यादव यांनीही नोटाबंदीला पाठिंबा दिला आहे. मोदी सरकारविरोधात छोट्या पक्षांची मोट बांधू पाहणाऱ्या काँग्रेससाठी हा धक्का मानला जात आहे.

नोटांबदीवरून 'घनघोर' आरोप-प्रत्यारोप सुरू असताना मंगळवारी नितीश कुमार यांनी लालू यांची भेट घेतली. या भेटीनंतर नितीश यांच्या उपस्थितीतच लालू यांनी राष्ट्रीय जनता दलाच्या आमदारांसमोर नोटाबंदीबाबत भूमिका मांडली. 'नोटाबंदी निर्णयाच्या केवळ अंमलबजावणीवर माझा आक्षेप होता. त्या निर्णयाला वा सरकारच्या हेतूला माझा आक्षेप नाही,' असं लालूंनी स्पष्ट केलं.

बिहारमध्ये सध्या नितीश कुमार, लालू यादव व काँग्रेसच्या महाआघाडीचं सरकार आहे. भाजपविरोध हा या आघाडीचा पाया आहे. मात्र, नोटाबंदीच्या निर्णयावर तिन्ही पक्षांमध्ये मतभेद होते. नितीश कुमार यांनी सुरुवातीपासूनच या निर्णयाला ठाम पाठिंबा दर्शवला. तर, लालू व काँग्रेसनं विरोधाची भूमिका घेतली होती. आता लालू यांनी अचानक भूमिका सौम्य केली आहे. त्यामुळं काँग्रेसची चांगलीच गोची झाली आहे.