दंतेवाडामधील चकमकीत ६ नक्षलवादी ठार

मटा ऑनलाइन वृत्त। छत्तीसगड

छत्तीसगडच्या दंतेवाडा जंगलात नक्षलवादी आणि पोलिसांमध्ये झालेल्या चकमकीत पोलिसांकडून ६ नक्षलवादी मारले गेल्याची प्राथमिक माहिती समोर आली आहे. ठार झालेल्या नक्षलवाद्यांचे शवही ताब्यात घेण्यात आले आहेत. या चकमकीत दोन जवानही गोळी लागून जखमी झाले आहेत.

पोलिस अजूनही जंगलात तैनात असल्याने एकूण किती नक्षलवादी मारले गेले असावेत, याचा नेमका आकडा समोर आलेला नाही. मात्र या नक्षलवादी कारवाईतील पोलिस अधिक्षक जीन बघेल यांनी नक्षलवाद्यांचे शव ताब्यात घेतल्याची माहिती दिली आहे. दंतेवाडाचे पोलिस निरीक्षक कमलोचन कश्यप यांनी देखील या माहितीची पुष्टी केली आहे. जिल्हा रुग्णालयात उपचार घेत असलेले जखमी जवान मुकेश ताती यांनी जवान गोपी यांच्या डोक्याला गोळी लागल्याचे सांगितले आहे. मात्र याविषयी अधिकृत माहिती अजून समोर आलेली नाही.

पोलिस सुत्रांनी दिलेल्या माहितीनुसार, ग्राम बर्रेम डोरेपाराच्या डोंगरभागातील जंगलांमध्ये डीआरएफ आणि एसटीएफ पोलिसांच्या संयुक्त टीम्स आणि नक्षलवादी यांच्यात चकमक झाली. पोलिसांकडून अनेक नक्षलवादी मारले गेले. अजूनही चकमक सुरू असून यात नक्षलवादी महिला कमांडर पलो देखील मारली गेल्याची तसेच गुंडाधर या नक्षलवाद्यास गोळी लागल्याचे व पोलिस त्याला घेराव घालण्याच्या प्रयत्नात असल्याची माहितीही समोर येत आहे. डीआरजी कमांडो संग्राम सिंह यांना हाताला गोळी लागली आहे. अद्याप सुरू असलेल्या चकमकीत नक्षलवाद्यांची संख्या वाढण्याची शक्यता वर्तवली जात आहे. पोलिसांनी या ठिकाणाहून शस्त्रास्त्रही जप्त केली असून यात दोन एके ४७ आणि एसएलआर यांचाही समावेश आहे. अरनपूर ठाणे अंतर्गत हे प्रकरण येते.