'लव्ह जिहाद'चा आरोप धुडकावून विवाह

मटा ऑनलाइन वृत्त । म्हैसूर

हिंदुत्ववादी संघटनांचा 'लव्ह जिहाद'चा आरोप आणि तीव्र विरोध धुडकावून कर्नाटकातील म्हैसूर येथे एका हिंदू तरुणीनं आज मुस्लिम तरुणाशी लग्नगाठ बांधली. मुलामुलीचे कुटुंबीय, मित्रमंडळी व शेकडो पोलिसांच्या साक्षीनं हा अनोखा सोहळा रंगला. हा सोहळा हाणून पाडण्यासाठी हिंदुत्ववादी संघटनांनी जोरदार निदर्शनं केली. मात्र, त्याचा काहीही उपयोग झाला नाही.

कर्नाटकातील मंड्या शहरात शेजारी-शेजारी राहणाऱ्या आशिता व शकील अहमद यांचे एकमेकांवर प्रेम होते. त्यांचं शिक्षण एकाच शाळेत व महाविद्यालयात झालं होतं. त्यानंतर दोघांनीही एकाच वेळी एमबीए केलं. लहानपणापासूनच्या मैत्रीतून दोघांचं प्रेम जुळलं होतं. गेली १२ वर्षे ते एकमेकांच्या प्रेमात होते. या प्रेमाला नात्याचं रूप देण्याचा निर्णय दोघांनी घेतला. दोघांच्या कुटुंबीयांनीही त्यास संमती दिली.

विश्व हिंदू परिषदेच्या कार्यकर्त्यांना याबाबत समजताच त्यांनी विवाहाला विरोध केला. 'हे केवळ प्रेम नाही. तसं असतं तर आमचा आक्षेप नव्हता. मात्र, हा 'लव्ह जिहाद' आहे. हिंदू मुलीशी लग्न करून तिला मुस्लिम बनविण्याचा शकीलचा डाव आहे,' असा आरोप विहिंपचे कर्नाटक राज्य सरचिटणीस बी. सुरेश यांनी केला. आशिता व शकीलचे कुटुंबीय मात्र लग्न करण्यावर ठाम होते. त्यांनी पोलीस संरक्षण घेऊन आज हा विवाह सोहळा उरकला. कर्नाटकातील प्रसिद्ध सामाजिक कार्यकर्ते के. एस. भगवान यांनी विवाहस्थळी उपस्थित राहून वधू-वरांना पाठिंबा दिला. 'सर्व भारतीय समान आहेत. आम्हाला विरोध करणाऱ्यांसाठी हा संदेश आहे. त्यांनी हे समजून घ्यावं,' अशी प्रतिक्रिया आशिताचे वडील डॉ. नरेंद्र बाबू यांनी दिली. तर, 'हा आनंदाचा दिवस आहे. सगळे लोक आनंद साजरा करत असताना ०.०१ टक्क्यांनी विरोध केला तर काय फरक पडतो,' असं शकीलचे वडील मुख्तार अहमद म्हणाले.