पंजाब विधानसभेत ठराव संमत
वृत्तसंस्था, चंडिगढ
शिखधर्मीयांच्या अमृतसर येथील पवित्र सुवर्णमंदिरात कीर्तन करण्यासाठी महिलांनाही परवानगी देण्यात यावी, अशी विनंती अकाल तख्त आणि शिरोमणी गुरुद्वारा प्रबंधक समिती (एसजीपीसी) यांना करणारा ठराव पंजाब विधानसभेने गुरुवारी एकमताने मंजूर केला.
राज्यातील मंत्री तृपत राजिंदर सिंग बाजवा यांनी याबाबतचा ठराव सभागृहात मांडला होता. शिख धर्माचे संस्थापक गुरुनानक देव यांनी आपले संपूर्ण आयुष्य जातीभेद आणि लिंगभेद नष्ट करण्यासाठी वेचले. शिखांच्या इतिहासात महिलांबाबत भेदभावाला कुठेच थारा नाही. त्यामुळे महिलांबाबतचा हा भेदभाव थांबायला हवा, असे बाजवा म्हणाले.
प्रारंभी या ठरावातील शब्दरचनेला विरोध करणाऱ्या शिरोमणी अकाली दलानेही नंतर पाठिंबा दिला, तर लोक इन्साफ पार्टीने हा ठराव मांडल्याबद्दल बाजवा यांचे अभिनंदन केले.
'जात, धर्म, सामाजिक स्थान, लिंग यावरून कोणत्याही प्रकारच्या भेदभावाला थारा नसलेल्या, समतावादी आणि सर्वांच्या कल्याणासाठी वचनबद्ध असलेल्या समाजाची कल्पना गुरू नानक देव यांनी केली होती. म्हणूनच गुरुबानी किंवा शिखांच्या इतिहासात कोणत्याही पातळीवर महिला व पुरुष यांच्यामध्ये कोणत्याही प्रकारचा भेद करण्यात आलेला नाही. मात्र शिखांचे सर्वोच्च श्रद्धास्थान असलेल्या अमृतसर येथील दरबार साहिबमध्ये महिलांना कीर्तन करण्यास प्रतिबंध करणे हे दुर्दैवी आहे. त्यामुळे गुरुबानीच्या गाभ्याचेच उल्लंघन करणारी ही भेदभावाची प्रथा बंद करावी आणि शिख महिलांना कीर्तन करण्याची परवानगी द्यावी, अशी विनंती या सभागृहाकडून अकाली तख्त तसेच शिरोमणी गुरुद्वारा प्रबंधक समितीला करण्यात येत आहे,' असे या ठरावात म्हटले आहे.