गुजरातमध्ये पुराचे थैमान

मटा ऑनलाइन वृत्त । अहमदाबाद

गुजरातमध्ये पावसाने थैमान घातले असून अनेक जिल्ह्यांवर पूरसंकट ओढवलं आहे. गेल्या दोन दिवसांत मोर्बी, राजकोट, सुरेंद्रनगर, बनासकांठा आणि अहमदाबाद जिल्ह्यातून ७ हजार लोकांना सुरक्षित स्थळी हलवण्यात आले आहे. १९ राज्यमार्ग आणि १०२ अंतर्गत रस्ते वाहतुकीसाठी बंद करण्यात आले आहेत. तसेच काही जिल्ह्यांत पुढील सूचना मिळेपर्यंत शाळा-कॉलेज बंद ठेवण्याचे आदेश प्रशासनाने दिले आहेत.

गुजरातचे मुख्यमंत्री विजय रुपानी यांनी सुरेंद्रनगर जिल्ह्यातील पूरग्रस्त भागाची हवाई पाहणी केली व स्थितीचा आढावा घेतला. उत्तर गुजरातमधील बनासकांठा आणि साबरकांठा हे जिल्हे तसेच दक्षिण गुजरातमधील वलसाड जिल्ह्यांना पुराचा सर्वाधिक फटका बसला आहे. ​



बनासकांठा जिल्ह्यातील अनेक शहरं आणि गावांना पुराच्या पाण्याचा वेढा पडला असून मदत आणि बचावकार्य युद्धपातळीवर सुरू करण्यात आलं आहे. मदतकार्यात एनडीआरएफ तसेच सैन्याचीही मदत घेतली जात आहे.



बनासकाठातील मुख्य रस्ते पाण्याखाली गेल्याने विविध भागांचा संपर्क तुटला आहे. गेनाजी भागातून स्थानिक प्रशासनाने १०५ लोकांना सुरक्षित स्थळी हलवले आहे. दीसा तालुक्यात पूरग्रस्तांसाठी ५ हजार फूडपॅकेट्स तसेच पिण्याच्या पाण्याचे पाउच पाठवण्यात आले आहेत.



जिल्ह्यातील धानेरा शहरात रेल नदीचे पाणी घुसले असून मार्केट यार्ड, बसस्थानक तसेच शहरातील अनेक भाग पाण्याखाली गेले आहेत.



अनेक ठिकाणी सात फुटांच्यावर पाणी भरले असून अनेक वाहने या पाण्यात फसली आहेत. पुराच्या पाण्यात अडकलेल्या ३०० लोकांना थराडमध्ये स्थलांतरित करण्यात आले आहे.



मोरबी जिल्ह्यातील मालिया स्टेशनवर एका १०५ वर्षीय महिलेला रेल्वेच्या डब्यात आश्रय घ्यावा लागला. ही महिला पुराच्या वेढ्यात अडकली होती. तिला तिच्या जावयाने सुखरुप बाहेर काढले.

ही बातमी गुजरातीत वाचा