covid vaccination record : रेकॉर्डब्रेक लसीकरण करत भारताने इतिहास रचला; पण लस न घेताच आले धडाधड मेसेजेस!

नवी दिल्लीः पंतप्रधान मोदींच्या वाढदिवसाला भारताने करोनावरील लसीकरण ( India Breaks Own Covid Vaccination Record ) मोहीमेत इतिहास रचला आहे. कोविन-पोर्टवरील आकडेनुसार देशात आज २ कोटी २२ लाख २८ हजार ६७५ नागरिकांना करोनावरील लस दिली गेली. दुपारी १.३० वाजेपर्यंत १ कोटींहून अधिक नागरिकांचे लसीकरण झाले होते, याची माहिती केंद्रीय आरोग्यमंत्री मनसुख मांडवीय यांनी ट्वीट करून दिली होती. आरोग्य कर्मचारी आणि जनतेने पंतप्रधान मोदींना आज वाढदिवसाची भेट दिली आहे. पंतप्रधान मोदींच्या वाढदिवसाला भारताने आज इतिहास रचला आहे. एका दिवसात २ कोटींहून अधिक लसींचे डोस दिले गेले, असं मांडवीय म्हणाले.

देशात २ कोटींहून अधिक नागरिकांचे लसीकरण झाल्यानंतर केंद्रीय आरोग्यमंत्री मनसुख मांडवीय यांनी दिल्लीतील सफदरजंग हॉस्पिटलला भेट दिली. त्यांनी आरोग्य कर्मचाऱ्यांसोबत या यशाचा आनंद साजरा केला. या यशाचे श्रेय मांडवीय यांनी सर्व आरोग्य कर्मचाऱ्यांना दिले.

देशात आज लसीकरण मोहीमेत प्रत्येक सेकंदाला ५२७ डोस म्हणजे प्रत्येक तासाला १९ लाख लसीचे डोस दिले जात होते. पण आज या लसीकरण मोहीमेत अनेक तक्रारी समोर आल्या आहेत. लस घेतली नसतानाही अनेकांना लस घेतल्याचे मेसेजेस आले.

pm modi birthday : PM मोदींच्या वाढदिवसाला मोठी भेट! रेकॉर्डब्रेक लसीकरण

लस न घेताच आले मेसेजे!

बिहारच्या नालंदात राहणाऱ्या राजू कुमारना दुपारी ४ वाजता एक मेसेज आला. कोविशिल्ड लसीचा दुसरा डोस दिला गेला आहे, असं तो मेसेज होतो. यानंतर राजू कुमार यांनी या मेसेजचा स्क्रिन शॉट शेअर करत ट्वीट केलं. मी आज लस घेतली नाही. तरीही आपल्याला लसीचा दुसऱ्या डोस घेतल्याचा मेसेज आला, असं त्यांनी ट्वीटमध्ये म्हटलंय.

लसीकरण केंद्रवरून परतवलं, लस न देताच मेसेज आला

मध्य प्रदेशातील मंदसौरमध्ये राहणाऱ्या अश्वीन पाटीदार यांनाही लस घेतलेली नसताना ती घेतल्याचा मेसेज आला. त्यांनी केंद्रीय आरोग्यमंत्री आणि पंतप्रधान मोदींना टॅग करत बनावट लसीकरणाचा मेसेज शेअर केला. सामान्य नागरिकांना धोका दिला जात आहे. केंद्रावर लसीकरणासाठी स्लॉट बुक झाला होता. पण आज लस दिली जाणार नाही, असं तिथे गेल्यावर कळलं. मग स्लॉट दिलेच का? आणि आता लस न घेताच ती घेतल्याचा मेसेज आला, असं अश्वीन पाटीदार ट्वीटमध्ये म्हणाले.

covid third wave india : करोनाची तिसरी लाट; पुढील तीन महिने महत्त्वाचे, केंद्राचे राज्यांना तयारीत राहण्याचे निर्देश

अशाच प्रकारे अनुराग प्रसिद्ध आणि त्यांची आई अर्चना झा यांना लस न घेताच करोनावरील लसीचा दुसरा डोस घेतल्याचा मेसेज आला. आम्ही गेल्या अनेक महिन्यांपासून लस घेण्यासाठी स्लॉट बुक करण्याचा प्रयत्न करतोय. पण मिळाला नाही. आता मेसेज आलाय. लसीकरण केंद्रावर न जाताच लसीचा दुसरा डोस दिला गेला, असं ते ट्वीटमध्ये म्हणाले.

सीएमओने म्हटले, 'तांत्रिक त्रुटीमुळे गडबड झाली'

उत्तर प्रदेशच्या लखीमपूरमधील रहिवासी शिवम भट्ट यांनी करोनावरील लसीकरणासाठी १७ सप्टेंबरचा स्लॉट बुक केला होता. पण काही कारणामुळे ते लस घ्यायला जाऊ शकले नाही. पण दुपारी ३ वाजता त्यांना एक मेसेज आला. तुम्हाला करोनावरील लसीचा दुसरा डोस दिला गेला आहे, असा तो मेसेज होता. यावर सीएमओनी स्पष्टीकरण दिलं. काही तांत्रिकराणामुळे असं होत असल्याचं ते म्हणाले.