अ‍ॅपशहर

आता राष्ट्रनिर्माणाकडे वाटचाल करू; मोदींचे देशवासीयांना आवाहन

राम मंदिर उभारण्याचा निर्णय सुप्रीम कोर्टाने दिला असून देशातील प्रत्येक नागरिकाला आता राष्ट्रनिर्माणाची जबबादारी घेऊन पुढे जायचे आहे. नवा भारत निर्माण करायचा आहे. या राष्ट्रनिर्माणाच्या कार्यात कटुतेला अजिबात स्थान असणार नाही. 'सबका साथ, सबका विकास और सबका विश्वास' हा मंत्र घेऊन आपल्याला पुढे जायचे आहे, असे आवाहन पंतप्रधान नरेंद्र मोदी यांनी केले.

महाराष्ट्र टाइम्स.कॉम 9 Nov 2019, 9:03 pm
नवी दिल्ली: राम मंदिर उभारण्याचा निर्णय सुप्रीम कोर्टाने दिला असून देशातील प्रत्येक नागरिकाला आता राष्ट्रनिर्माणाची जबबादारी घेऊन पुढे जायचे आहे. नवा भारत निर्माण करायचा आहे. या राष्ट्रनिर्माणाच्या कार्यात कटुतेला अजिबात स्थान असणार नाही. 'सबका साथ, सबका विकास और सबका विश्वास' हा मंत्र घेऊन आपल्याला पुढे जायचे आहे, असे आवाहन पंतप्रधान नरेंद्र मोदी यांनी केले.

अयोध्या वादावर सुप्रीम कोर्टाने आज ऐतिहासिक निकाल दिला. या निकालाच्या पार्श्वभूमीवर पंतप्रधान मोदी यांनी देशाला उद्देशून भाषण केले. आपल्या ११ मिनिटांच्या भाषणात मोदींनी देशवासीयांना महत्त्वाचा संदेश दिला. 'विविधतेत एकता ही भारताची ओळख असून आज पुन्हा एकदा त्याचं महत्त्व अधोरेखित झालं आहे. आजचा दिवस सुवर्णाक्षरांनी लिहावा असा आहे. हे इतिहासातून पलटलेलं एखादं पान नाही तर देशातील सव्वाशे कोटी जनतेनेच हा इतिहास आपणहून रचला आहे. सुप्रीम कोर्टाने जो निकाल दिला आहे तो सर्वांनीच मनापासून स्वीकारला आहे. त्यातूनच भारतातील लोकशाही जिवंत आहे आणि भक्कम आहे, याचे दर्शन अवघ्या जगाला घडले आहे,' असे पंतप्रधान म्हणाले.

सुन्नी वक्फ बोर्डाची पुनर्विचार याचिका नाहीच

शेकडो वर्षांचा इतिहास असलेल्या एका खटल्यावर सुप्रीम कोर्टाने महत्त्वपूर्ण असा निकाल दिला. या खटल्यावर नियमित सुनावणी व्हावी, असे अनेकांचे मत होते आणि त्यानुसार ही सुनावणी झाली व त्यावर निकालही सुनावण्यात आला. सुप्रीम कोर्टाने सर्वांची बाजू ऐकून घेतली आणि सर्वसहमतीने निर्णय दिला, असे नमूद करताना पतंप्रधानांनी बर्लिनचा दाखला दिला. आज ९ नोव्हेंबर आहे आणि आजच्याच दिवशी बर्लिनची भिंत पाडण्यात आली होती. दोन परस्पर विरुद्ध विचारधारांना बाजूला सारत एकजुटीचा संकल्प करण्यात आला होता. तोच योग आजही जुळून आला आहे. आजच ९ नोव्हेंबरच्या दिवशी करतारपूर कॉरिडॉरचीही सुरुवात करण्यात आली. भारत आणि पाकिस्तान या दोन देशांचं यात योगदान राहिलं. ही तारीख अनेक अर्थांनी आपल्याला एकत्र राहून पुढे वाटचाल करण्याचा संदेश देत आहे, असे पंतप्रधान म्हणाले. देशभरात उद्या ईद हा सण साजरा केला जात असून त्यानिमित्त पंतप्रधान मोदी यांनी शुभेच्छाही दिल्या.

अयोध्येतील वादग्रस्त जागा राम मंदिर न्यासाकडे

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज