'आम्ही तुमचे जीवाभावाचे साथीदार'

वृत्तसंस्था, गांधीनगर

'भारत तुमचा जीवाभावाचा मित्र आहे आणि यापुढेही आपल्यांतील सहकार्य दृढच राहील,' अशी ग्वाही परराष्ट्रमंत्री सुषमा स्वराज यांनी आफ्रिकी देशांना दिली. 'व्हायब्रंट गुजरात' परिषदेत सुमारे ५० आफ्रिकी देशांच्या प्रतिनिधींसमोर त्या बोलत होत्या. यंदा या परिषदेत प्रथमच आफ्रिका दिनाचे आयोजन करण्यात आले होते. भारताच्या परराष्ट्र आणि आर्थिक धोरणात आफ्रिकी देशांना सर्वोच्च प्राधान्य आहे, असे पंतप्रधान नरेंद्र मोदी यांनी जाहीर केले आहे, असेही स्वराज म्हणाल्या.

'आफ्रिका सध्या सुरक्षा, पुनरुत्थान आणि भरभराट या दिशेने वाटचाल करीत असताना भारत आफ्रिकेतील नागरिकांच्या आर्थिक आणि सामाजिक सक्षमीकरणासाठी तुमचा विश्वासू साथीदार म्हणून तुमच्या बरोबर आहे,' असे स्वराज म्हणाल्या. 'आफ्रिकी देशांचे महत्त्व अधोरेखित करण्यासाठीच गुंतवणूकदारांच्या या परिषदेत प्रथमच एक संपूर्ण दिवस आफ्रिकेसाठी समर्पित करण्यात आला आहे,' असेही त्यांनी सांगितले.

महात्मा गांधींची शतकोत्तर सुवर्णमहोत्सवी (१५० वी) जयंती आणि आफ्रिकेन गांधी म्हणून ओळखले जाणारे नेल्सन मंडेला यांच्या जन्मशताब्दी वर्षात ही परिषद होत आहे, हा अपूर्व योगायोग आहे, याकडे स्वराज यांनी लक्ष वेधले.

स्वराज यांच्यापूर्वी युगांडाचे परराष्ट्रमंत्री हेन्री ओकेलो यांचे भाषण झाले. 'भारत आणि आफ्रिका यांच्यातील संबंधांमध्ये साचलेपणा आल्यामुळेच चीनने त्या पोकळीत शिरका‌व केला आणि तेथे मोठ्या प्रमाणावर गुंतणूक केली. आता मात्र गोष्टी पुन्हा सुरळीत व्हायला हव्यात,' अशी अपेक्षा ओकेलो यांनी व्यक्त केली.

६२.६६ अब्ज डॉलर - सन २०१७-१८मधील भारत आणि आफ्रिकी देशांतील व्यापार

२२ टक्के - त्या आधीच्या वर्षीच्या तुलनेत व्यापारात झालेली वाढ

३८ - आफ्रिकी देशांशी भारताचा मुक्त व्यापार

५४ अब्ज डॉलर - भारताची आफ्रिकी देशांतील गुंतवणूक