नेपाळसोबत सीमा वाद; दोन्ही देशांचे हॅकर्स भिडले

काठमांडू : नेपाळने आपल्या नव्या राष्ट्रीय नकाशात भारतीय भूभागाचाही समावेश केल्यानंतर सीमेवर तणाव वाढला. पण यानंतर नेपाळ आणि भारत यांचा हा सीमा वाद आता हॅकर्सपर्यंत पोहोचला आहे. बुधवारी नेपाळने नवा नकाशा जारी करताच भारतीय हॅकर्सने नेपाळच्या सरकारी वेबसाइट्सवर हल्लाबोल सुरू केला. या वेबसाइटवर विविध प्रकारच्या धमक्या देण्यात आल्याचं वृत्त 'काठमांडू पोस्ट'ने दिलं आहे. नेपाळचा नवा नकाशा हा इतिहासाच्या आधारावर जारी करण्यात आल्याचं नेपाळकडून सांगण्यात आलं. पण भारतीय हॅकर्सने नेपाळचा इतिहास संग्रहित असलेली वेबसाइटच हॅक केली.

लिपुलेख वाद चिघळणार?; भारत सीमेवर नेपाळकडून सशस्त्र पोलीस आउटपोस्ट

गुरुवारी शमहरुश या भारतीय हॅकर ग्रुपने नेपाळच्या राष्ट्रीय ग्रंथालयाची वेबसाइट हॅक केल्याचा दावा केला. दरम्यान, ही वेबसाइट सध्या सुरळीत सुरू आहे. मात्र होम पेजवर Hacked by Shamharoosh असा मेसेज दिसत आहे. नेपाळ राष्ट्रीय ग्रंथालयाचे प्रमुख उपेंद्र प्रसाद मैनाली यांच्या मते, या वेबसाइटमध्ये नेपाळच्या इतिहासाचे पुस्तके आहेत. यापैकी काही पुस्तके ३०० वर्षे जुनी आहेत. वेबसाइट हॅक झाल्याचं गुरुवारी एका कर्मचाऱ्याकडून समजलं आणि यावर आता काम सुरू आहे, असं त्यांनी काठमांडू पोस्टला सांगितलं.

...म्हणून नेपाळनं आव्हान देऊनही मोदी सरकार शांत; शिवसेनेचा आरोप

काही दिवसांपूर्वीच वनस्पतीशास्त्र संशोधन केंद्र ही नेपाळची सरकारी वेबसाइट हॅक करण्यात आली होती. इंडियन सायबर ट्रुप्सने याची जबाबदारी घेतली होती. मुख्य संकेतस्थळही विकृत करणं आम्हाला शक्य होतं. पण ते करायचं नाही, असं या ग्रुपने सांगितलं. सीमा वादामुळे वेबसाइट हॅक केली असल्याचे संकेत देत नेपाळने आपला नकाशा तातडीने सुधारित करावा, अशी मागणीही या हॅकर ग्रुपने केली. आपल्याकडे नेपाळच्या गृह मंत्रालयाच्या वेबसाइटचंही अॅक्सेस असल्याची धमकी या हॅकर ग्रुपने दिली.

नेपाळचा नवा नकाशा तथ्यहिन आणि बनावट, भारताने दावा फेटाळला

दरम्यान, काही नेपाळच्या हॅकर्सनेही भारतीय वेबसाइट हॅक करण्याचा प्रयत्न केला. एबीपीची एपीआय की मिळवली असल्याचा दावा ब्रम्हा आणि सतन या दोन ट्विटर अकाऊंटवरुन करण्यात आला. या दोन्ही प्रोफाईलमध्ये हॅकर्स कोणत्या देशाचे आहेत, त्याचा उल्लेख नाही. मात्र हे दोन्ही हॅकर्स नेपाळचे असावेत, असं सांगितलं जात आहे. याशिवाय लडाख विद्यापीठाची वेबसाइट हॅक केल्याचा दावाही एका नेपाळच्या हॅकरने केला. दोन्ही देशांच्या वेबसाइटवर हल्लाबोल केल्यानंतर आपण शांततेसाठी एकमेकांशी बोललो असल्याचा दावा हॅकर्सने केला. मात्र या हॅकर्स अटॅकमुळे नेपाळच्या वेबसाइट किती असुरक्षित आहेत, ते समोर आलं आहे.

नेपाळचा भारताच्या ३९५ चौकिमी भूभागावर दावा; नवा नकाशा जाहीर

नेपाळचा नवा नकाशा

नेपाळने बुधवारी नवा नकाशा जारी केला, ज्यात कालापानी, लिम्पियाधुरा आणि लिपुलेख हा भाग नेपाळमध्ये दाखवण्यात आला आहे. भारताने यावर तीव्र आक्षेप घेत नकाशा मान्य नसल्याचं सांगितलं. नेपाळने यावर संवाद साधावा. हा कृत्रिम नकाशा भारताकडून कधीही स्वीकारला जाणार नाही, अशी प्रतिक्रिया परराष्ट्र मंत्रालयाचे प्रवक्ते अनुराग श्रीवास्तव यांनी दिली.