पायलटच्या बदल्यात पाकिस्तानची चाल..भारताचं सणसणीत उत्तर

नवी दिल्ली:

भारत आणि पाकिस्तानदरम्यानच्या तणावग्रस्त परिस्थिती आता पाकिस्तानने आणखी एक चाल खेळण्याचा प्रयत्न केला आहे. पाकिस्तानच्या ताब्यात असलेल्या भारतीय हवाई दलाच्या पायलटला (विंग कमांडर अभिनंदन) जर भारताला सुपूर्द केल्यानंतर जर बदल्यात तणाव निवळणार असेल (डि-एस्कलेशन) तर पाकिस्तान पायलटला भारताच्या सुपूर्द करण्यास तयार आहे, असे पाकिस्तानचे परराष्ट्र मंत्री शाह महमूद कुरेशी यांनी एक टीव्ही वाहिनीशी बोलताना सांगितले.

पाकिस्तानचे पंतप्रधान इम्रान खान भारताच्या पंतप्रधानांना दूरध्वनी करण्यास तयार आहे, असेही कुरेशी म्हणाले. भारताने मात्र कुरेशी यांच्या या विधानाला सणसणीत उत्तर दिले आहे. भारतीय पायलटची बिनशर्त त्वरित सुटका व्हायला हवी. कोणताही तह वगैरे करण्याचा प्रश्नच नाही, असे भारतीय परराष्ट्र मंत्रालयाने म्हटले आहे. पाकिस्तानने भारतीय पायलटला मानवतापूर्ण वागणूक द्यावी. जर अभिनंदन यांना काहीही झालं तर पाकिस्तानने पुढील कारवाईसाठी तयार राहावे, असा इशाराही भारताने पाकिस्तानला दिला आहे.

परराष्ट्र मंत्रालयाच्या सूत्रांनी दिलेल्या माहितीनुसार, पाकिस्तान कंदाहार प्रकरणी जसा दबाव निर्माण केला होता, त्याच प्रकारचा दबाव आणण्याचा प्रयत्न करत आहे, पण भारत कोणत्याही सौदैबाजीस तयार नाही. पुलवामा हल्ल्यानंतर भारताने पाकिस्तानच्या कोणत्याही सैन्य तळांवर किंवा नागरिकांवर हल्ला केला नव्हता, पण पाकिस्तान भारतीय लष्कराच्या ठिकाण्यांना लक्ष्य करून तणाव वाढवण्याचा प्रयत्न करत आहे. भारताने नियंत्रण रेषा जाणीवपूर्वक पार केली नव्हती. भारताने पाकिस्तानचे युद्धसदृश स्थिती निर्माण करण्याचे प्रयत्न हाणून पाडले आहेत.