भारत-रशिया युद्धनौका करार

नवी दिल्ली: दोन अत्याधुनिक क्षेपाणास्त्रवाहू युद्धनौकांच्या निर्मितीसाठी भारताने रशियाशी ५० कोटी डॉलरचा करार केला असून, गोवा येथे या नौकांची उभारणी केली जाणार आहे. रशियाकडून लष्करी सहकार्य घेण्यावरून अमेरिकेने भारताला निर्बंधांचा इशारा दिला असतानाही भारताने हा करार केला आहे. भारत-रशियातील संरक्षणविषयक सहकार्य सुरूच राहील, असे संकेत त्यातून मिळत आहेत.

या दोन युद्धनौका 'तलवार' श्रेणीतील असतील. गोवा शिपयार्ड आणि रशियाच्या रोसोबॉरोनएक्स्पोर्ट या सरकारी कंपन्यांदरम्यान हा करार झाला आहे. त्यानुसार रशिया भारताला या युद्धनौकांची रचना, तंत्रज्ञान आणि महत्त्वाची उपकरणे पुरवणार आहे. या नौकांवर अत्यंत आधुनिक क्षेपणास्रे आणि अन्य शस्त्रे असतील, असे सांगण्यात आले.