पाकला आर्थिक तडाखा देण्याची तयारी

मटा ऑनलाइन वृत्त । नवी दिल्ली

उरी हल्ल्यानंतर पाकिस्तानची चहूकडून कोंडी करण्याच्या हालचालींना वेग आला आहे. सिंधू पाणीवाटप कराराचा फेरविचार करण्यासाठी समिती नेमल्यानंतर आता पाकला जबरदस्त आर्थिक तडाखा देण्याची तयारी मोदी सरकारनं चालवली आहे. पाकिस्तानला भारतानं दिलेला 'सर्वाधिक पसंतीचा देश' हा दर्जा काढून हा झटका दिला जाणार आहे. त्यासाठी पंतप्रधान नरेंद्र मोदी यांनी गुरुवारी महत्त्वपूर्ण बैठक बोलावली आहे.

व्यावसायिक संबंध वृद्धिंगत करण्यासाठी जगातील वेगवेगळे देश परस्परांना 'सर्वाधिक पसंतीचा देश' असा दर्जा देतात. व्यापारात कोणतेही नुकसान पोहोचवले जाणार नाही, अशी हमी त्यात अंतर्भूत असते. भारतानं १९९९ साली पाकिस्तानला असा एकतर्फी दर्जा दिला आहे. त्याअंतर्गत पाकिस्तानला जास्तीत जास्त आयात कोटा व कमीत कमी व्यापारी कराची सवलत देण्यात आली आहे. मात्र, पाकिस्तानला दिलेला हा दर्जा काढण्याचा विचार आता सरकार करत आहे.

पंतप्रधानांच्या उपस्थितीत गुरुवारी होणाऱ्या बैठकीत याबाबत निर्णय घेतला जाणार आहे. पंतप्रधान कार्यालय, वाणिज्य व परराष्ट्र खात्याचे अधिकारी या बैठकीला उपस्थित राहतील.