भारत रशियाकडून तेल आयात वाढविणार

नवी दिल्ली: रशियाच्या अतिपूर्वेकडील तेल आणि वायू क्षेत्र आणि द्रवरूप नैसर्गिक वायूंच्या (एलएनजी) टर्मिनलमध्ये गुंतवणूक करण्याचा प्रस्ताव भारताने रशियासमोर मंगळवारी ठेवला. रशियाकडून तेल आयात वाढविण्याचे भारताने निश्चित केले आहे.

रशियातील प्रमुख तेल उत्पादक कंपनी रोसनेफ्टचे मुख्य कार्यकारी अधिकारी इगोर सेचिन यांनी मंगळवारी केंद्रीय पेट्रोटलियम मंत्री धर्मेंद्र प्रधान यांची भेट घेतली. त्या वेळी रशियातील गुंतवणूक संधींबाबत प्रधान यांनी सेचिन यांच्याशी चर्चा केली.

'रशियाकडून होणारी तेल आयात वाढविण्याबाबत आम्ही व्यापक चर्चा केली. काही तरी नक्कीच हाती पडेल असा विश्वास आम्हाला आहे,' अशी माहिती प्रधान यांनी दिली.

सध्या भारत रशियाकडून खूप कमी कच्चे तेल आयात करतो. मात्र, पंतप्रधान नरेंद्र मोदी यांच्या नुकत्याच पार पडलेल्या रशिया दौऱ्यात चेन्नई ते व्लाडिव्होस्टॉक दरम्यान नवा सागरी मार्ग विकसित करण्याची घोषणा करण्यात आली होती. रशियाच्या अतिपूर्वेकडील क्षेत्रातील तेल आणि नैसर्गिक वायू क्षेत्रात रोसनेफ्ट या रशियाच्या राष्ट्रीय कंपनीच्या ताब्यात आहेत. रोसनेफ्ट ४९.९ टक्के समभाग विकू इच्छिते. रशियातील सखलीन-३ हे पूर्व सैबिरेयिताली व्हॅनकोर येथील आणि तिमान चेचोरा भागातील टर्ब्स आणि तितोव्ब्या तेलक्षेत्रांत हिस्सा घेण्याची तयारी भारताने दाखविली आहे.