लष्कर, हिंदू संघटना अल-कायदाचे ‘टार्गेट’

नवी दिल्ली : ‘काश्मीरमधील आमच्या बांधवाचे रक्त ज्यांच्या हाताला लागले आहे, ते सर्व आमचे शत्रू आहेत,’ अशा शब्दात अल-कायदाने प्रसिद्धीपत्रक जाहीर करून इशारा दिला आहे. भारताचे लष्कर आणि हिंदू संघटनांच्या नेत्यांना ‘टार्गेट’ करण्याचे आमचे धोरण असेल, अशीही गरळ पत्रकांत ओकण्यात आली आहे.

भारतीय उपखंडातील मुजाहिदीनांसाठी अल-कायदाने नियमावली जाहीर केली असून, त्यामध्ये नेमके काय करावे आणि काय करू नये, यांची यादीच देण्यात आली आहे. ‘भारतीय लष्कराचे सर्व कर्मचारी हे आमचे ‘टार्गेट’ असतील. सीमेवर तैनात असोत किंवा कार्यालयांमध्ये. कामावर असो किंवा रजेवर. लष्करातील सर्व आमचे शत्रू आहेत. जवानांपेक्षा लष्करी अधिकाऱ्यांना ठार मारण्याला आमचे प्राधान्य असेल. अधिकारी जेवढा वरिष्ठ तेवढा त्याला मारण्याचे प्राधान्य अधिक. शरियतला विरोध करणारे सर्व जण आमचे शत्रू असतील,’ अशा सांगत अल-कायदाने खुमखुमी दाखवून दिली आहे.

पाकिस्तानची दर्पोक्ती

हिज्बुल मुजाहिद्दीनचा म्होरक्या सय्यद सलाउद्दीन आला आंतरराष्ट्रीय दहशतवादी घोषित करण्याचा अमेरिकेचा निर्णय पूर्णपणे अन्यायकारक आहे, असा कांगावा पाकिस्तानने केला आहे. तसेच, आम्ही यापुढेही काश्मिरी स्वातंत्र्यासाठी लढणाऱ्यांना पाठिंबा देणारच, अशी दर्पोक्तीही केली.