पाक जवानांची घुसखोरी रोखली

वृत्तसंस्था, श्रीनगर

काश्मीरच्या कुपवाडा जिल्ह्यातील केरान भागात पाकिस्तानच्या बॉर्डर अॅक्शन टीमकडून (बॅट) केला गेलेला घुसखोरीचा प्रयत्न लष्कराने उधळून लावला. लष्कराच्या कडव्या प्रतिकारामुळे पाकिस्तानी सैनिक व घुसखोरांना पाकव्याप्त काश्मीरमध्ये परत जाणे भाग पडले. या धुमश्चक्रीत भारतीय लष्कराची कोणतीही जीवितहानी झाली नाही.

सोमवारी मध्यरात्री एकच्या सुमारास सात-आठ सशस्त्र घुसखोर केरान भागातून काश्मीरमध्ये घुसण्याचा प्रयत्न करीत होते. पाकिस्तानी लष्कराच्या चौक्यांमधून उखळी तोफांचा मारा आणि गोळीबाराद्वारे या घुसखोरांना संरक्षण देण्यात येत होते. भारताच्या चौक्या उद्ध्वस्त करण्याचा घुसखोरांचा कट होता. मात्र भारतीय जवानांनी जोरदार प्रत्युत्तर देत हा हल्ला परतवून लावला. अखेर या प्रतिकारामुळे सर्व घुसखोरांना माघार घ्यावी लागली.

हिजबुल कमांडर ठार

भारतातील ५० जणांच्या हत्येप्रकरणी गेली १७ वर्षे सुरक्षा दलांच्या रडारवर असलेला हिजबुल संघटनेचा कमांडर अब्दुल कय्युम नजर याला मंगळवारी सकाळी लष्कराने कंठस्नान घातले. पाकच्या हद्दीतील दहशतवादी तळावरून भारतात शिरून हिजबुलचा स्थानिक कमांडर म्हणून सूत्रे हाती घेण्यासाठी तो आला असता, सुरक्षा दलांशी चकमक झाली. ४३ वर्षांचा नजर बारामुल्ला जिल्ह्यातील सोपोरचा रहिवासी होता.