भारताचा 'भीष्म' देणार पाकलगत सीमेवर पहारा

नवी दिल्ली:

भारतीय लष्कराच्या ताफ्यात ४६४ अतिरिक्त टी-९० 'भीष्म' रणगाडे दाखल होणार आहेत. त्यासाठी भारत सरकारनं रशियासोबत १३,४४८ कोटी रुपयांचा संरक्षण करार केला आहे. हे सर्व रणगाडे २०२२-२०२६ या कालावधीत भारतीय लष्कराला मिळतील. ते सर्व पाकिस्तानला लागून असलेल्या सीमेवर तैनात करण्यात येणार आहेत. दुसरीकडे पाकिस्तानही रशियासोबत ३६० रणगाडे मिळवण्यासाठी एका सुरक्षा करारावर चर्चा करत आहे.

भारतीय लष्करात नव्याने येणारे हे टी-९० भीष्म रणगाडे अद्ययावत असतील आणि त्यांची निर्मिती भारतातच होईल. संरक्षण मंत्रालयातील सूत्रांनुसार, यासंबंधी रशियाकडून महिनाभरापूर्वीच 'एक्विझिशन लायसेन्स'ला मंजुरी मिळाली आहे. रणगाड्यांच्या निर्मितीसाठीचे 'इंडेंट' (मागणी पत्र) लवकरच ऑर्डिनन्स फॅक्टरी बोर्डांतर्गत चेन्नईतील अवाडी हेवी व्हेइकल फॅक्टरीकडे (एचव्हीएफ) असेल.

लष्कराच्या ६७ बख्तरबंद रेजिमेंटमध्ये आधीपासूनच १०७० टी-९० रणगाडे, १२४ अर्जुन आणि २४०० जुने टी-७२ रणगाडे आहेत. सुरुवातीचे ६५७ टी-९० रणगाडे २००१ रोजी रशियाकडून घेतले होते. तर अन्य १००० रणगाड्यांच्या निर्मितीचा परवाना घेतल्यानंतर ते एचव्हीएफमध्ये तयार करण्यात आले होते.

रात्रीच्या अंधारातही भिडण्याची क्षमता

या नव्या रणगाड्यांमध्ये रात्रीच्या अंधारातही लढण्याची क्षमता आहे. सूत्रांच्या माहितीनुसार, ४६४ रणगाड्यांच्या 'इंडेंट' प्रक्रियेला विलंब झाला आहे. ती पूर्ण झाल्यानंतर ६४ रणगाडे ३०-४१ महिन्यांत भारतीय लष्कराला मिळणे अपेक्षित आहे.