'स्नॅपचॅट'ला भारतानं 'असा' दाखवला इंगा!

मटा ऑनलाइन वृत्त । नवी दिल्ली

भारताला 'गरीब देश' म्हणून हिणवणारे 'स्नॅपचॅट'चे सीईओ इवान स्पीगल यांना भारतीय हॅकर्सनी चांगलाच इंगा दाखवला आहे. १७ लाख स्नॅपचॅट यूजर्सची खासगी माहिती हॅक करून ती डीप वेबवर लीक केल्याचा दावा काही हॅकर्सनी केलाय. इवान स्पीगल यांचा वचपा काढण्यासाठी हे हॅकिंग केल्याचं त्यांनी म्हटलंय.

'स्नॅपचॅट केवळ श्रीमंतांसाठी आहे. मी हा व्यवसाय भारत आणि स्पेनसारख्या गरीब देशांमध्ये करू इच्छित नाही', असं वक्तव्य कंपनीचे सीईओ इवान स्पीगल यांनी सप्टेंबर २०१५ मध्ये एक बैठकीत म्हटल्याचे वृत्त 'व्हरायटी' या नियतकालिकानं दिलं होतं. त्यात त्यांनी 'स्नॅपचॅट'च्या एका माजी कर्मचाऱ्याचा हवाला दिला होता. स्वाभाविकच, या बातमीनं भारतीयांच्या स्वाभिमानाला धक्का लागला आणि 'स्नॅपचॅट'चे 'बुरे दिन' सुरू झाले.

अॅपल स्टोअरवरचं स्नॅपचॅटचं रेटिंग 'फाइव्ह स्टार'वरून 'सिंगल स्टार'वर घसरलं. त्याचवेळी ट्विटरवर #UninstallSnapchat आणि #BoycottSnapchat अशी मोहीमही राबवण्यात आली. त्याला पाठिंबा देत सुमारे २० लाख यूजर्सनी हे अॅप आपल्या फोनमधून काढून टाकल्याचं कळतं. त्या पाठोपाठ भारतीय हॅकर्सनीही कंपनीला हिसका दिल्याचं समोर आलंय.

दरम्यान, 'स्नॅपचॅट'नं या संपूर्ण प्रकरणावर आपली बाजू मांडली आहे. इवान स्पीगल यांनी कधीच भारताला गरीब देश म्हटलं नव्हतं. असंतुष्ट माजी कर्मचारी त्यांच्या बदनामीसाठी खोटंनाटं पसरवत आहे, असा दावा त्यांनी केला आहे. स्नॅपचॅट सर्वांसाठी आहे आणि त्याला उदंड प्रतिसाद दिल्याबद्दल आम्ही भारतीयांचे आभारी आहोत, असंही त्यांनी नमूद केलंय. त्यामुळे आता स्नॅपचॅटवरचा राग निवळणार का, हे पाहावं लागेल.